MULU: Agih belanja ari Unit Pekara Pengarap Bukai (UNIFOR) enggau penyampau RM480,000 udah diberi ngagai dua buah rumah sembiang di Mulu dikena nyaup pe,mansang, ngadu sereta ngemanah perengka guna.

Sapit Menteri ba Opis Premier Sarawak (Orang Gawa, Imigresen enggau Matau Projek) Datuk Gerawat Gala madah, bantu nya ngelai pementas Perintah Sarawak ke pengelantang rumah sembiang enda ngira jalai pengarap tauka ba dini alai.

Ku iya, bantu UNIFOR semampai deka diberi nyengkaum di menua ulu sungai.

"Perintah Sarawak semampai deka nyaup semua enda ngira bansa tauka jalai pengarap. Nengah UNIFOR, bantu deka diberi betandu dikena nyukung rumah sembiang seraya ngenegap pengelantang rayat mayuh," pia ku iya.

Iya bejaku munyi nya maya pengawa nyua chek bantu UNIFOR ba Taman Negara Mulu, empai lama tu tadi.

Ba pengawa nya, Direktor UNIFOR, Dato Georgina Apphia Ngau nyuaka pemeri RM250,000 ngagai Gerija Borneo Evangelical Mission (BEM) Long Terawaan lalu Gerija St Philip nerima RM230,000.

Iya ke Kaban Kunsil Nengeri (ADUN) Mulu madah, pemeri nya tau nyaup nambah perengka guna rumah sembiang ngambika lantang, likun sereta engkeman dikena bala mayuh.-EDISI UKAS