Mandal Presiden PBB Sarawak ke mega Sapit Menteri Pelajar, Inovasyen enggau Pemansang Pengelandik Sarawak Datuk Dr. Annuar Rapaee madah, raban nembiak lebih agi sida ke beumur 40 taun ke baruh nyadi raban ti megai tanggungpengawa ke besai nempa iringtuai dudi hari.
Iya ke mega Kaban Kunsil Nengeri (ADUN) Nangka madah, Raban Nembiak enda semina datai maya sida diguna aja tang meseti semampai bisi begulai sereta mending penemu rayat lalu ngembing pemansang nengeri.
"Anang semina datai maya orang nguna aja tang semampai bisi begulai enggau rayat," ku iya madah.
Iya bejaku munyi nya maya Program Randau Pemesai Begulai Enggau Raban Nembiak PBB Sibu ke diatur Exco Raban Nembiak PBB Nengeri Sarawak ditu, Hari Minggu.
Datuk Dr. Annuar mega ngelalau Raban Nembiak semampai besaup enggau pangan diri ngatur program begulai enggau komuniti.
Kelimpah ari nya, iya ngarapka rebak maya hari tu seruruan nitihka ubah pemansang Sarawak lalu meretika polisi enggau kuing tuju Perintah Sarawak pegai Gabungan Parti Sarawak (GPS).
Bela datai maya nya Sapit Menteri Pemakai, Komoditi enggau Pemansang Kandang Menua Sarawak ke mega Tuai Exco Raban Nembiak PBB Datuk Martin Ben, ADUN Machan ke mega Sapit Tuai Exco Raban Nembiak PBB Allan Siden Gramong, Sekretari Politik ngagai Premier Sarawak ke mega Sapit Tuai Pampang PBB Nangka Syed Azmi Wan Junaidi sereta Sekretari Politik ngagai Premier Sarawak ke mega Sapit Tukang Wang Raban Nembiak PBB Afiq Fiqkri Brahim. - EDISI UKAS
