MIRI: Pemutus numbuh pelajar pechuma Perintah Sarawak udah nyaup 4,694 iku nembiak naka 4 Mei taun tu.

Sapit Menteri Daganhg Temuai, Industri Kreatif enggau Seni Pemerindang Sarawak, Datuk Sebastian Ting Chiew Yew madah, bantu nya ditumbuh ketegal ngira pemujur pelajar ulih nyungkak tikas pengidup diri.

Ku iya, pengawa nyendia pelajar enggau peluang belajar jauh manah ba pengawa nempa pengelantang pengidup anak dudi hari enti dibanding semina meri bantu belanja aja.

"Pemujur pelajar tu besai reti. Enti kitai meri pelajar enggau penemu ngagai bala anak, penguntung enggau pemaik deka semampai diasai sida nyentuk ila," ku iya madah.

Iya bejaku munyi nya maya Malam Masa Media enggau Insentif Pelajar Anak Raban 2026 ke diatur Gerempung Pemberita Sarawak Utara (NSJA) ditu, Hari Satu.

Iya ke mega Kaban Kunsil Nengeri (ADUN) Piasau madah, penyampau nembiak ke deka nerima bantu nya disadang deka majak nambah bepun ari pemutus Sijil Tinggi Persekolahan Malaysia (STPM) udah pansut.

Iya madah, penyampau nya bela mandangka pengeransing perintah Sarawak ngerembaika agi peluang belajar ngagai rayat Sarawak.

Berebak enggau nya, Datuk Sebastian ngelalau bala apai indai ngambika semampai chakah nentuka anak sida bulih bantu pelajar kelimpah meruan nyukung pelajar anak.

Bela datai maya nya Datuk Bandar Bandaraya Miri ke mega ADUN Pujut, Adam Yii Siew Sang.—EDISI UKAS