MUKAH: Sapit Sekretari Perintah Sarawak (Operasyen), Datu Hii Chang Kee, ngatur pejalai ngabas pengawa besikap kepenudi nyau deka datai ba hari nyadi Program Sarawakku Sayang (SKS) Sitak Mukah 2026 ke deka diatur ari 2 nyentuk 4 Oktober tu.

Tuju pejalai kena Hari Satu nya dikena nentuka pengawa besikap ba tetiap endur diadu nitihka taga ke ditetapka, lalu nyamin pengawa lanchar sereta pengelantang pengusung sepanjai program nya.

Entara endur diabas iya nya Gerai Kopi Market Dana tauka tampak agi dikangau Stabak Mukah dikena ngabas gaya jalai enggau pekara logistik ungkup achara briskwalk begulai enggau Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, ke ditaga berengkah tumu pukul 6.30 pagi ba hari kedua program, sebedau iya disadang ngirup pagi dia.

Datu Hii disempulang bala bukai bela ngabas Dataran Pehin Setia Raja ke nyadi nalan besai ngatur Program SKS Sitak Mukah.

Pejalai nya deka meda pengawa besikap ba suyuk besai, pavilion servis sereta zon bejual ke disadang ulih endur beribu pengusung.

Nyempulang iya, Residen Sitak Mukah Rahman Bujang Seli, Sapit Residen Sitak Mukah Badjuri Bidin, Pegawai Pelilih Mukah Peleadzman Ahip, Pegawai Penguasa MYSED Sitak Mukah Rasidah Rasit enggau Tuai Polis Pelilih Mukah DSP Mohamad Rizal Alias.

Sepanjai tiga hari program nya, Dataran Pehin Setia Raja deka ditapat mensia mayuh ke ngena konsep kaunter siti palan ke ngemuntangka pengusung ngulihka bemacham servis perintah.

Program nya bela nyendiaka awak ngagai orang dagang lokal ngulihka penatai pemisi nengah Mukah Kitchen & Sales.

Bepelasarka taga ke ditetap, Program SKS Mukah 2026 deka dipun enggau Malam Budaya Sarawak kena 2 Oktober ke mantaika bemacham pesaka etnik sereta beperindang enggau artis lokal.

Batang program iya nya Pengawa Bejadi ke deka dipenyadika Premier Sarawak kena Hari Enam, 3 Oktober, pukul 10.30 pagi.

Muak ke malam nya, pengusung deka diperindang Konsert Rayat ke mai bala penanyi tebilang menua enggau artis lokal.-EDISI UKAS