KUCHING: Sarawak majak ransing matau, neritka atur enggau nagang pejalai jelu meraka entara menua dikena ngetanka pengawa nyapai status nadai rabies.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, penuduk geografi Sarawak di Borneo sereta kaul kandang menua sepiak ngasuh kerejasama meraka entara menua beguna endar dikena nagang lalu munas rabies.

Ku iya, penyakit nya enda ngelala entara pelilih menua, nengeri tauka menua, nya kebuah pengawa “Rabies enda ngelala entara menua. Penyakit tu enda mida entara pelilih, nengeri tauka menua. Nya alai, pengawa kitai mutar mega enda ulih semina ditatak ba entara menua aja,” ku iya.

Iya nyebut pekara nya nengah teks jaku dibacha Sapit Premier Sarawak, Datuk Amar Professor Dr Sim Hui Kian lebuh pengawa ngelanchar Rabies in Asia (RIA) 2026 ke diatur serimbai enggau Rabies in Borneo (RIB) 2026 di Palan Konvensyen Borneo Kuching (BCCK), ditu, Hari Dua.

Ku Premier Sarawak, pangku pengawa Immune Belt Enforcement Team (IBET) patut majak ditegap nyadi sebagi ari pengawa nagang rabies, lebih agi ba endur jelu nyamai mindah.

Ku iya, 113 raban IBET ngambi bagi ba konvensyen nya lalu bejalaika pangku pengawa ngenegapka pengawa matau, neritka atur enggau nagang ba menua.

Iya madah, Sarawak bela nampung mayuh pengawa nagang enggau matau nyengkaum vaksinasi, matau, neritaka atur, nambah penemu mensia mayuh sereta kerejasama mayuh agensi enggau bakih strategik.

Entara chara ke dipejalai iya nya Vaksinasi Rabies Oral (ORV) dikena ngulihka jelu lelang ke mar ditangkap enggau divaksin chara konvensional.

Program di menua pemadu baru ngaul pengawa ngetan 2,281 umpan vaksin oral kelimpah vaksinasi 3,579 iku ukui.

Datuk Patinggi Abang Zohari nyemetak madah, pengawa munas rabies enda ulih dilempai ba perintah aja, tang begunaka penemu pakar teknikal, peneleba gawa di menua, komuniti enggau mayuh organisasyen bekunsi penerang sama.

Berindik ari nya, chara One Health majak chakah dipejalai enggau kerejasama sektor pengerai veterinar enggau pengerai mensia mayuh, disukung agensi penerit adat, raban bekuasa lokal, pemansik, organisasyen ngintu pengelantang jelu enggau komuniti.

Ku iya, kerembai pelasar Rabies in Borneo ngagai Rabies in Asia udah ngerandang peluang ngenegapka kerejasama enggau mayuh agi menua enggau organisasyen, lebih agi ari sukut matau, vaksinasi, nyaga pejalai jelu, pemansang kapasiti enggau bekunsi penemu.

“Penerang munas rabies enda ulih diadu siti menua, siti agensi tauka siti profesion aja. Ti begunaka pengeransing semua enggau pemadu beguna, kerejasama,” ku iya mantangka jaku.

Kerejasama nya beguna endar dikena nentuka tetiap pengawa nagang, nyidi, matau pejalai jelu enggau kaul komuniti majak ditegap nyentuk juluk ati munas rabies nyadi nyata.

Sama datai, Kaban Kunsil Nengeri (ADUN) Tebedu, ke mega Kaban Kaunsil Veterinar Malaysia, Dr Simon Sinang @ Sinang Bada, Sekretari Mendam Opis Menteri Pengerai Mensia Mayuh, Pengawa Berumah enggau Perintah Lokal Sarawak (MPHLG), Datu Elizabeth Loh, Direktor Opis Servis Veterinar Sarawak (DVS), Datu Dr. Adrian Susin Ambud, Direktor Unit Pengelikun enggau Penerit Adat Sarawak (UKPS), Abdul Wahab Rahim, Presiden Serakup Nagang Ulah Menyati Jelu Sarawak (SSPCA), Datin Sri Dona Drury Wee enggau Pemungkal Begulai ke mega Tuai Pegawai Eksekutif Place Borneo Sdn Bhd, Mona Abdul Manap. - EDISI UKAS

Pemberita: Lonney Jinab
Gambar: Jaed Tepus