KUCHING: Sarawak ngerikod RM11.2 bilion puku diperanak ke dikemendar dalam sektor primer, kilang enggau sevis ungkup timpuh tengan keterubah 2026.
Sapit Premier Sarawak Datuk Amar Awang Tengah Ali Hasan madah, pemujur nya nampung pengawa Sarawak meranak puku pengudah mujur bulih asil RM116 bilion puku diperanak ke dikemendar entara 2021 nyentuk 2025.
Ku iya, Sarawak patut nentuka pengawa meranak puku ke diterima ukai semina ngasuh ekonomi tumbuh aja, tang mega kaul tegap agi enggau ekonomi sereta pemekuh lokal.
“Kitai dekaka pengawa meranak puku, sekali ke Meranak Puku Domestik Terus (DDI) tauka Meranak Puku Terus Menua Luar (FDI), ngerandang pengawa puang begaji besai, mindah teknologi enggau penemu, dagang lokal ke entap agi sereta akses makit ke besai agi,” ku iya.
Iya madah munyi nya ba mua mayuh maya Pengawa Bejadi 'Sarawak Global Supply Chain & Sourcing 2026' di sebuah hotel tebilang ditu, Hari Dua.
Ku iya, transformasyen ekonomi Sarawak diatu ngerandang peluang ba sektor kilang maju enggau semikonduktor, energi gadung, ili minyak, gas enggau petrokimia, logam gadung, hidrogen enggau teknologi beresi, ekonomi digital, ‘artificial intelligent’ (AI), aero singka miga, injiniring, betanam betupi enggau kilang pemakai.
Berindik ari nya ku iya, pengawa meranakka puku besai ba endur industri strategik baka Kuching, Bintulu enggau Miri patut disambung enggau meruan agi ngagai dagang Sarawak ba bidang injiniring, ngintu, logistik, teknologi, servis profesional, kilang, pemutar digital enggau servis khas.
Berebak enggau nya, Datuk Amar Awang Tengah nyemetak madahka kaul ba rentayan bekal global begunaka inovasyen, disiplin enggau seruran dikemanah dikena nangkup peminta penguna global ari sukut kualiti, pengelaku makit, semekih, inovasyen sereta standard rampa menua, rama enggau atur gawa (ESG).
“Reti nya, negap setipikit, standard kualiti, sistem ngatur, kapasiti pemansut, besikap belanja, mekh teknologi enggau penerang ulih dipechaya,” terang iya.
Sama datai, Sapit Menteri Dagang Antarabansa, Industri enggau Meranak Puku Sarawak Datuk Dr Malcolm Mussen Lamoh, Sekretari Mendam Opis Menteri Dagang Antarabansa, Industri enggau Meranak Puku Sarawak (MINTRED) Datu Lester Matthew, Penyanding Penemu MINTRED Dato Sri Mohd Naroden Majais sereta temuai dipebasa bukai. -EDISI UKAS
