PANTU: Sepenyampau RM20,000 diagih nengah Projek Mit Pemansang Menua Pesisir (MRP) dikena nyukung aktiviti ngaul komuniti di Kampung Muding.

Sapit Menteri Dagang Temuai, Industri Kreatif enggau Seni Pemerindang Sarawak ke mega Kaban Kunsil Nengeri (ADUN) Balai Ringin, Datuk Snowdan Lawan madah, agih belanja nya ngaul RM15,000 ngagai Komiti Pemansang enggau Pengelikun Genturung Pendiau (JKKK) sereta RM5,000 ngagai Biro Indu.

Ku iya, agih belanja nya dikearap ulih mantu JKKK enggau Biro Indu ngatur aktiviti sereta program ke meri pemaik ngagai peranak dia.

Iya nyebut pekara nya lebuh Program Randau Ruai di Rumah Achang Mumin, Kampung Muding, kena Hari Minggu.

Program Randau Ruai nya mega bela nyadi awak ngagai peranak ngulihka penerang terus bekaul polisi perintah, pengawa ngintu pengelantang enggau pemansang ke benung enggau deka dipejalai ba menua nya.

Lebih 80 Tuai Komuniti enggau Tuai Raban Bansa (KMKK) bela ngulu program randau ruai nya ke meri perati ngagai pekara pemansang menua pesisir, ngintu pengelantang rayat enggau bantu ke disediaka perintah.

Ngenang pekara bekaul, projek ngaga jalai baru sepanjai 42 kilometer ngena agih belanja RM265.5 juta deka nambahka rentayan jalai penyambung sekeda genturung pendiau ba menua nya.

Projek nya disadang meri pemaik ngagai peranak Kampung Tuba, Kampung Muding, Kampung Mentu enggau Kampung Ipoh ari akses ke manah agi ke pasar, klinik, opis perintah sereta perengka guna mensia mayuh ke bukai.-EDISI UKAS