Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, pengawa nya beguna endar dikena ngangkatka ukai semina penyampau asil dipansutka aja, tang kualiti, pengelikun enggau rega tambah produk agro lokal.
Ku iya, pengawa bekenaka teknologi baru mega beguna endar dikena matak mayuh agi raban biak ngaul diri ba sektor betanam betupi, kelimpah mutar pemar komuniti betanam ke majak tuai.
“Udah datai ba maya kitai ngena enggau nelebaka diri enggau teknologi baru,” ku iya lebuh bejaku ba Pengawa Bejadi Sarawak Agrofest 2026 di Padang Bilun Lama Bintulu, kena Hari Satu.
Pengawa nya dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
Dato Sri Dr Stephen Rundi madah, pemansang sektor agro ukai semina bepanggai ba pemesai tanah aja, tang meri perati ngagai kualiti sereta pengulih makit produk.
Ku iya, pengawa ngenegapka rentayan bekal ari renggat ulu nyentuk ili, nyengkaum industri nginjin enggau makit, patut diberi perati dikena nambahka rega tambah produk betanam betupi.
Ba konteks jamin bekal pemakai, Rundi madahka Sarawak bela meri perati ngagai pengawa nambahka pemansut padi enggau beras, nyengkaum pemansang infrastruktur parit enggau entali ai dikena nyukung endur bumai.
Iya madah, perintah mega benung nyerungkai chara Design, Build, Operate and Transfer (DBOT) ke ngaul raban ke ngembuan kapasiti, teknologi, penemu pakar enggau puku belanja dikena ngerumban pemansang sektor padi.
“Padi chukup beguna, ukai semina ngagai Sarawak aja, tang mega ke jamin bekal pemakai menua,” ku iya.
Dato Sri Dr Stephen Rundi mega ngansak orang bumai meda bidang betanam betupi tu nyadi siti pengawa dagang enggau mansutka produk ke bisi nilai ekonomi lalu ulih ngangkatka penatai pemisi.
Ku iya, pengawa matak rebak biak ke sektor agro patut seruran dipejalai ari nyendiaka peluang ngagai sida ngulihka penemu, latih enggau pengelandik bekenaka teknologi moden.
Sarawak Agrofest 2026 ke diatur ari 25 September nyentuk 4 Oktober di Padang Bilun Lama Bintulu ngena sulu jaku Ngaga Inovasyen Ke Jamin Bekal Pemakai tauka “Innovating Agriculture for Food Security”.
Edisyen keenam program tu naga 800,000 pengusung sereta asil bejual manggai RM6.5 juta sepanjai 10 hari program.
Bisi 201 penyereta ngambi bagi ba mayuh segmen nyengkaum Pavilion Pameran, Sarawak Kitchen, Agrotrade, Agrotech, Agrofresh enggau Agroinput.- EDISI UKAS
