MUKAH: Bisi 50 agensi perintah enggau 170 bansa servis deka disediaka ngagai rayat serimbai Program Sarawakku Sayang (SKS) 2026 Sitak Mukah ke deka diatur di Dataran Pehin Setia Raja berengkah ari 2 nyentuk 4 Oktober tu.

Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, penyampau nya entara ke pemadu mayuh naka diatu ba tusun pejalai SKS, lalu nya meri peluang ngagai rayat nerima bemacham servis perintah terus dia.

Ku iya, SKS nyadi pelasar Perintah Sarawak ngenyemakka perintah enggau rayat nengah chara ngundang gawa ke menua lebuh agensi, opis enggau opis menteri nyendiaka servis terus ngagai rayat.

“SKS Sitak Mukah nyadi edisyen ba tusun pejalai program nya enggau pengawa bejadi deka dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg kena 3 Oktober,” ku iya ba aum media SKS 2026 Sitak Mukah, di Palan Opis Perintah Sarawak, ditu, Hari Satu.

Iya madah, tujuh kluster besai disediaka mungkur administrasyen sitak enggau pelilih, digital enggau inovasyen, pengawa dagang, pelajar enggau pemansang modal mensia, pengerai, rama enggau ngintu pengelantang sereta kaunter bebayar enggau servis.

Iya nerang, entara servis ke disedia nyengkaum Kaunter Tali Khidmat, servis digital baka SarawakPass enggau SPayGlobal sereta bantu belanja, geran enggau latih orang dagang.

“Ba raban nembiak enggau orang ngiga kereja, intebiu tebuka ari baruh JobSarawak bela diatur enggau nyereta tujuh kompeni iya nya Sarawak Oil Palms Berhad, Press Metal Sdn Bhd, Takaful Ikhlas, OM Materials (Sarawak) Sdn Bhd, Tradewinds Plantation, Rinwood Plantation enggau TH Plantation.

“Tu ngasuh kompeni pemadu mayuh ngambi bagi ba program JobSarawak naka diatu,” ku iya.

Kaban Kunsil Nengeri (ADUN) Dalat nya madah, edisyen sekali tu mega meri rega tambah baru ke alai Bank Negara Malaysia ngambi bagi ke nyendiaka servis meresa duit enda diambi sereta servis sanding penemu bekaul jali enggau ngaduka baru pekara wang sereta JAIS ke nyendiaka servis nyengkaum ngaga kad tikah nadai bebayar.

Iya madah baru, ari sukut pengerai, Opis Pengerai Nengeri Sarawak nyendiaka pengawa beperesa pengerai sereta pengeregas, nyengkaum betuchuk vaksin influenza nadai bebayar ungkup orang tuai enggau beperesa HPV DNA riman pun sarang anak nadai bebayar.

Program nya bisi ngatur lumba rayat, pemerindang Kabardian enggau Konsert Rayat, kelimpah 85 perais e-Peraduan enggau perais besai sebuah kerita Proton Saga berega RM41,000.

Nangkan nya, Dato Sri Fatimah nerang, SKS Sitak Mukah ke asal ditaga diatur kena 28 nyentuk 30 Ogos nyin tadi dilanjar ngagai 2 nyentuk 4 Oktober ketegal sebun.

Ku iya, aktiviti luar nyengkaum achara bejalai belepa begulai enggau Premier Sarawak deka bepanggai ba gaya pemanah angin nentuka pengerai enggau pengelikun mensia mayuh.

Nya alai, Dato Sri Fatimah ngarapka rayat Sitak Mukah enggau menua ngelingi nya sampal datai beambi ulih ba bemacham servis ke disediaka.

Sama datai, Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh, Sapit Sekretari Perintah Sarawak (Operasyen), Datu Hii Chang Kee, ADUN Tellian Royston Valentine, Direktor Unit Pematau Pejalai Sarawak (SIMU) Sapiah Daud enggau Residen Sitak Mukah Bujang Rahman Seli. -EDISI UKAS