KUCHING: Akses ngagai pengawa nagang, nyidi tumu enggau berubat riman patut ditmbah dikena nentuka indu ba kandang menua pesisir, menua ulu enggau komuniti Orang Asal ngambi pengerai sida bela dijaga.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah, madahka pemesai menua Sarawak ngasuh tebal agi indu napi pemar ngulihka servis pengerai, nyengkaum pejalai jauh, belanja pengangkut enggau endur diau bemalam, tanggungpengawa ke diri sebilik, penanggul ba jaku sereta peragam penemu.
“Gaya penuduk menua siku-siku enda patut nekul peluang ngulihka servis nyidi tumu riman.
“Bansa, penemu tauka jaku mega enda patut nentuka sekali ke indu nya nerima ulih perubat ba maya ke patut,” ku iya.
Iya nibarka jaku nya lebuh bekunsi penemu pejuluk “Closing the Gaps — Women, Families, and Equity in Cancer Care” maya Konvensyen Besai enggau Aum Saintifik ke-13 Asian Pacific Organization for Cancer Prevention (APOCP) di Waterfront Hotel, ditu, Hari Satu.
Dato Sri Fatimah madahka pengawa mutar riman patut nyerangkung semua pengawa nyaga, ari pelajar pengerai, nagang enggau nyidi tumu nyentuk diagnosis, berubat, suman sereta nyaga paliatif enggau pengujung nyawa.
Iya mega madahka pematut ngaul komuniti Orang Asal dalam perambu enggau pemansang program pengerai riman, kelimpah nentuka servis diberi ari berundingka budaya, jaku enggau utai diguna komuniti menua nya.
