LIMBANG: Projek infrastruktur di Limbang dipejalai nitihka pemerat dikena nentuka pemansang ke diperambu ulih nangkup utai diguna rayat, lebih agi dikena nambahka perengka guna pemun, ngaduka rentayan penyambung sereta meransang sosioekonomi peranak menua tumbuh menyana.

Sapit Menteri Pengangkut ke mega Kaban Parlimen Limbang, Datuk Hasbi Habibollah madah, perambu silik ngaul kerejasama entara perintah nengeri enggau Perintah Besai beguna endar dikena nentuka projek infrastruktur ulih dipejalai enggau lanchar.

“Siti-siti projek patut nengah beberapa proses, berengkah ari renggat tungkap enggau gaya langkar, dientudi proses tinda sebedau digaga,” ku iya bejaku ba Program Tuai Enggau Rayat: Pengawa Nyua Geran MRP, ditu, Hari Minggu.

Ku Datuk Hasbi, perambu enggau pengawa nyeraris ke berurun beguna endar dikena nentuka projek lanchar, belanja dikena manah enggau pemaik pemansang ulih diasai peranak menua.

Iya madah baru, gaya ekonomi maya diatu mega mangki pejalai projek lebuh projek ke empai ditinda nyau dilanjar dikena meri peluang ngagai projek ke benung digaga.

Ku iya, entara projek ke dikemendar nyengkaum jalai Kubong Ulu Pandaruan ke beungkus beratus juta ringgit, kelimpah Jalai Limpaku Pinang ke diatu benung digaga.

Ba pengawa ke sama, bisi 110 penerima udah nerima geran MRP ngaul Komiti Pemansang enggau Pengelikun Genturung Pendiau (JKKK) enggau pampang Pengari Serakup Raban Indu Sarawak (PPWS) Pelilih Limbang ke alai penyampau semua geran nya RM371,000.

Sama datai, Penulung Pegawai Pelilih Limbang Mariati Samat, Penghulu Franky Isak enggau Chairperson PPWS Daerah Limbang Dayang Suridah Mohd Superi.-EDISI UKAS