KUCHING: Sarawak ngansak Komiti Besai Komunikasyen enggau Multimedia Malaysia (MCMC) nambahka spektrum telekomunikasyen dikena ngurangka penyekut rentayan berindik ari penguna servis digital di nengeri tu majak nambah.

Menteri Utiliti enggau Telekomunikasyen Sarawak, Dato Sri Julaihi Narawi madah, kapasiti rentayan patut ditegap seriris enggau komuniti majak bepanggai ba servis tali arus.

Ku iya, pengawa bekenaka servis tali arus ke meruan enggau meri pemaik patut majak diperansang dikena nentuka perengka guna telekomunikasyen dikena semua.

“Semua raban enda tau enda bekerejasama dikena nentuka infrastruktur telekomunikasyen seruran manah, likun enggau ulih dikena magang,” ku iya nengah siti penerang di Facebook rasmi iya, Hari Dua.

Iya madah baru, penanggul tali kabel enggau gentian optik jai ketegal dipenyati sereta dichuri bela begunaka pengawa neritka undang-undang enggau kerejasama semua raban.

Berebak enggau nya, Dato Sri Julaihi nyemetak madahka pengawa ngintu infrastruktur telekomunikasyen patut dipejalai berurun agi enggau meri perati jampat ngagai tiang pemanchar ke singit, kabel tauka tali karan ke merundai baruh sereta utai tumbuh nyerangkap ke tau ngeruga struktur enggau perengka guna nya.

Ku iya, MCMC patut bejalaika pengawa dikena nentuka pengawa ngintu diberi perati, enggau kerejasama semua agensi enggau operator servis telekomunikasyen sereta sukung belanja ke chukup.

Iya mega ngansak operator servis telekomunikasyen ngenegapka kerejasama, nyengkaum nyerungkai pengawa bekenaka teknologi Multi-Operator Core Network (MOCN) begulai ngambi penguna ulih ngasai bungkur enggau servis ke manah agi nadai ngira menua endur sida diau.

Ngenang pekara bekaul, iya merambu premis ke bepanggai ba transaksyen tali aus baka stesyen minyak ngena kangau tetap nyadi chara dagang, seraya servis mindah kin kitu dikena nyadi sistem bantu dikena ngurangka penanggul servis tejanggal.

Iya nerang, chara nya beguna endar dikena nentuka pengawa penguna ulih diadu enti siti ari rentayan nya tejanggal. -EDISI UKAS