KUCHING: Sarawak deka ngenegapka agi penuduk nyadi hub serantau mutar penyarut dagang antarabansa nengah penumbuh Asian International Arbitration Centre (AIAC) Sarawak di Kuching ke diagih enggau belanja RM10 juta dikena ngaduka begunan pesaka nyadi palan operasyen.
Menteri ba Opis Menteri Besai (Undang-undang enggau Reformasyen Institusyen) Dato Sri Azalina Othman Said madah, AIAC Sarawak ukai semina pampang aja tang megai pengawa nyadi hub serantau ungkup Borneo ke nyaup operasyen di Kuala Lumpur.
Ku iya, penumbuh hub nya bela deka ngerembaika agi akses ngagai mekanisme mutar penyarut alternatif (ADR) lebih agi bekaul dagang enggau pemeranak puku antarabansa.
"Pemeranak puku mesti bisi pengandal, endur sida meranakka puku ulih nyaga undang-undang nyengkaum platform ti mutar penyarut antarabansa.
"Nya alai, AIAC Sarawak ukai semina pampang aja, tang nyadi hub serantau ke deka ngerembaika agi akses mutar penyarut dagang antarabansa di Borneo," pia ku iya.
Iya bejaku munyi nya ngagai media sepengudah ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg lalu ngulu pengawa nyain sempekat penumbuh AIAC Sarawak ba Kunsil Nengeri (DUN) Sarawak ditu, Hari Satu.
Nambahka jaku iya, Dato Sri Azalina madah, agih RM10 juta dikena ngaduka begunan pesaka nya sebagi ari pengawa nyendiaka perengka guna operasyen hub nya.
Ku iya, penumbuh AIAC Sarawak bela disadang numbuh awak ngagai pengemeran undang-undang baka firma luyar ngatur penyarut dagang kilah entara menua.
Iya madah, AIAC Sarawak disadang ngepunka operasyen ba taun 2027.
Bela datai maya nya Sekretari Perintah Sarawak Datuk Amar Mohamad Abu Bakar Marzuki enggau Sapit Menteri ba Opis Premier Sarawak (Undang-undang, MA63 enggau Kaul Nengeri-Perintah Besai), Datuk Sharifah Hasidah Sayeed Aman Ghazali sereta Luyar Besai Sarawak Dato Sri Saferi Ali.-EDISI UKAS
