KUCHING: Penyelai kereban muzik asal pupu etnik ti digembar tiun moden enggau progresif nengah Konsert Sound of Borneo 2026 ngayanka pesaka muzik Sarawak bisi pengulih diangkat nyadi pematak dagang temuai budaya tikas antarabansa.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, pemerindang ti dibantai ukai semina merindang mensia mayuh aja, tang mujur ngayanka pemanah pengelain budaya rayat Sarawak nengah muzik asal enggau kontemporari dipegulai.
Ku iya, kereban muzik asal baka sape, gambus enggau gendang ti ditebah ngembar muzik moden mujur ngasilka tiun fusion ke nyelai ti enda ngelenyauka identiti enggau penulin tiun asal.
“Semua pemerindang chukup manah enggau merindang ati. Tetiap pemuzik mujur mandangka penyelai kereban muzik asal pupu etnik nengah tusun muzik, tiun enggau lagu moden sereta progresif.
“Tu mandangka muzik asal ulih majak ngerembai nipak pemansang jeman enggau enda nejuka pesaka budaya asal,” ku iya.
Iya nibarka jaku nya lebuh ngenang Konsert Sound of Borneo 2026 ke diatur ba Panggau Seni Sarawak Regatta 2026, Kuching Waterfront, ditu Hari Enam.
Datuk Abdullah bela meri jaku puji ngagai Kaunsil Seni Sarawak (MSS) ke udah ngatur konsert nya ke dipeda nyadi pelasar besai mandangka pengelandik seni sereta pesaka muzik pupu etnik di Sarawak.
Ba penemu iya, konsert baka nya endang patut diangkat nyadi achara ninting taun laban ulih matak pengusung ari pupu bansa, kelimpah temuai ari menua tu enggau menua luar.
“Achara baka tu patut diangkat nyadi achara ninting taun di Sarawak laban penyelai iya ulih narit ati pupu bansa sereta temuai antarabansa,” ku iya.
Iya mega nyemetak madahka muzik ngembuan pengelebih kediri nyadi pelasar ngempung komuniti nadai ngira tirai juru etnik, budaya tauka jaku.
Ku iya, pemerindang ke ngempung tiun pupu etnik ukai semina ngemayuhka rampa seni pemerindang lokal aja, tang ulih negapka semangat penyerakup enggau pengelantang komuniti di Sarawak sereta Borneo.
Konsert Sound of Borneo 2026 beperindang enggau bala artis sereta pemuzik nyengkaum Jerry Kamit, Fauziah Gambus, Razali Kulingtangan, Suk Bini’e sereta Orkestra Tradisional Nengeri Sarawak (TONS), ke mandangka pengelain pesaka muzik asal ba pemerindang ngena gaya kontemporari.-Edisi UKAS
