KUCHING: Bemacham aktiviti deka diatur dikena nambahka pengagit enggau penemu rayat Sarawak nyau semak pengawa ngatur Lumba SEA 2027, nyengkaum achara niap hari sereta perambu numbuhka Palan Operasyen di Palan Akuatik Pandalela.

Sapit Sekretari Perintah Sarawak (Operasyen) ke mega Chairman Komiti Kereja Pengatur Lokal (LOC) Kluster Sarawak, Datu Hii Chang Kee madah, bemacham inisiatif nya diperambu dikena nentuka pengawa besikap ngatur lumba lanchar, kelimpah nambah penemu rayat bekaul pangku pengawa Sarawak nyadi tuai rumah.

“Diatu, kitai beteda 330 hari da agi nuju 18 September. Bemacham aktiviti deka diatur dikena besikap nuju Lumba SEA 2027, nyengkaum engka numbuhka Palan Operasyen di Palan Akuatik Pandalela sereta ngatur achara niap 300 hari bulan November (taun tu), 200 hari ba bulan Mac enggau 100 hari bulan Jun taun baru,” ku iya.

Iya nyebut pekara nya lebuh dirandau pemberita pengudah Woksyop Penyeraris Komiti Kereja Lumba SEA 2027, ditu, Hari Minggu.

Berebak enggau nya, Datu Hii madah, pengawa nyeraris entara LOC Kluster Sarawak enggau Komiti Pengatur Lumba SEA Malaysia (MASOC) bela dikemerat dikena nentuka semua pengawa besikap diatur berurun.

Iya nerang, sekeda pekara agi patut dikerandau silik begulai enggau MASOC, lebih agi bekaul penyampau elaun bala gawa enggau volunteer, penyampau endur diau, pemakai, rejista volunteer, netapka achara lumba enggau main sereta penyampau atlit ke deka bepekit.

Taja pia ku iya, naka diatu nadai penanggul besai tauka penekul besai ke ngeruga pengawa Kluster Sarawak besikap.

Iya nyemetak madah, kaul rat enggau kerejasama entara LOC Kluster Sarawak enggau MASOC beguna endar dikena nentuka tetipa pengawa besikap ulih diatur berurun enggau nemban. -EDISI UKAS

Pemberita: Ahmad Daniel Faiz
Gambar: Ibanez Jeffery