KUCHING: Pengawa Kluster Sarawak besikap ngatur Lumba SEA 2027 majak ditegap nengah Woksyop Penyeraris Komiti Kereja ke ngaul 21 komiti enggau lebih 100 kaban dikena nentuka semua pekara ngatur diseraris datai ba hari pekit nyadi bulan September taun baru.
Sapit Sekretari Perintah Sarawak (Operasi) ke mega Chairman Komiti Kereja Pengatur Lokal (LOC) Kluster Sarawak, Datu Hii Chang Kee madah, tuju woksyop pengelama tiga hari nya nyerenih baru perambu tumu, ngelala utai ke patut dikemanah enggau nentuka tetiap komiti sedia bejalaika tanggungpengawa sida empu.
“Sepanjai tiga hari woksyop tu, kami tepantup ati meda asil ke diulih. Tetiap komiti diatu udah nyengala agi bekaul atur malin diri empu, harta gawa enggau charta organisasyen, kelimpah kelimpah matriks bepanggai entara semua komiti.
“Ari pengawa nyeraris tu, tetiap komiti udah meretika pangku pengawa diri sereta utai diguna komiti bukai, lalu nya ngasuh semua ulih gawa dalam siti tim nuju Lumba SEA bulan September 2027,” ku iya.
Iya nyebut pekara nya lebuh dirandau pemberita pengudah woksyop nya, ditu Hari Minggu.
Ku iya, woksyop nya bela mantu negapka sinergi enggau koordinasi entara komiti ngambi semua raban ulih gawa ke siti tuju sereta visyen ke sama.
Ngenang bekaul pengawa besikap operasyen, Datu Hii nerang, tetiap komiti udah ngepunka perambu bepelasarka skop kereja diri empu, nyengkaum pengangkut, pemakai ungkup atlit enggau endur diau.
Ku iya, tetiap komiti bela bisi kaul rat enggau raban bekaul bukai nentuka perambu enggau pengawa lanchar.
Iya mega madah, siti da aum komiti kereja deka diatur enda lama da, dientudi aum komiti besai ke deka betuaika Menteri Nembiak, Lumba enggau Pemansang Orang Dagang, Dato Sri Abdul Karim Rahman Hamzah, sebedau ujung taun tu. -EDISI UKAS
Pemberita: Ahmad Daniel Faiz
Gambar: Ibanez Jeffery
