BETONG: Kerejasama rat entara pengajar, apai indai nengah Gerempung Apai Indai enggau Pengajar (PIBG) patut ditegap dikena nentuka nembiak bulih embing kenyau ari pra sekula nyadi pemun nyulut ba akademik.

Sapit Menteri Nembiak, Lumba enggau Pemansang Orang Dagang Sarawak ke mega Kaban Kunsil Nengeri (ADUN) Layar, Datuk Gerald Rentap Jabu madah pemun pelajar ke entap beguna endar dikena nambahka peluang nembiak nampung pelajar ke palan pelajar dipilih, nyengkaum Yayasan Sarawak International Secondary School (YSISS) enggau Maktab Rendah Sains MARA (MRSM).

Ku iya, pintar bidang Sains, Teknologi, Injiniring enggau Matematik (STEM) mega patut diberi perati kenyau ari sekula dikena nyikap rebak bisi napi pemansang teknologi enggau ngerebut peluang ba sektor baru, nyengkaum industri aero singka miga.

“Aku minta pengajar ngena manah kereban teknologi baka papan pintar enggau ‘artificial intelligent’ (AI), nyengkaum ChatGPT, ngena chara kreatif enggau bisi tanggungpengawa dikena nambahka penemban pengawa ngajar enggau ngasuh nembiak rindu belajar,” ku iya.

Iya nibarka jaku nya maya Program Merarau Sekula Primari (SK) St Bartholomew di Balai Lumba Tan Sri Datuk Amar Stephen Kalong Ningkan, ditu, Hari Enam.

Seraya Kaban Parlimen Betong, Dato Dr Richard Rapu madahka pemujur pelajar ukai semina tanggungpengawa raban sekula aja, tang apai indai enggau komuniti regas ngaul diri, enggau PIBG nyadi jematan entara sekula enggau nembiak sebilik.

Iya mega meransang apai indai enggau nembiak ngena manah peluang pelajar tinggi pechuma ke disediaka Perintah Sarawak di universiti enggi nengeri.

Ku iya, pemansang deras teknologi enggau AI begunaka nembiak diiri penemu ke patut kenyau ari sekula primari ngambi sida sedia napi ubah enggau ulih ngena teknologi.

Iya bela bekunsi pekara bekaul bantu pelajar, nyengkaum nambah Bantu Bepungkal Sekula (BAP) taun 2027 ngagai RM200 ke tetiap nembiak, dibanding RM150 sebedau tu, sereta inisiatif bantu elaun belanja idup ngagai nembiak Pom Enam ke patut nerima manggai RM2,500 setaun ari baru polisi baru perintah.

Ba program sama, Dato Dr Richard bisi ngemendarka pemeri RM5,000 ngagai PIBG SK St Bartholomew ke saup ngatur aktiviti enggau program sekula nya.

Berebak enggau nya, lima sekula mission dipegai sitak Kunsil Nengeri (DUN) Layar nerima agih belanja Unit Pekara Pengarap Bukai (UNIFOR) penyampau RM781,000 ungkup 2026 dikena bejalaika projek pemansang enggau ngaduka perengka guna sekula.

Ari penyampau nya, SK St Bartholomew nerima RM70,000 dikena ngaga jalai beperabung, endur nyembi gari beperabung di buding sereta ngadu agu sekula.

Empat da sekula ke nerima iya nya SK St Peter & St Paul, SK St Augustine, SK St Mark enggau Sekula Sekondari (SMK) St Augustine.

Chek bantu nya disua Datuk Gerald ngagai pengari sekula ke nerima.

Bela datai, Pegawai Pelilih Betong, Laga Kueh, Chairman Layar Education Development Committee (LEDC), Paul Langgang, Penulung Pegawai Opis Pelajar Pelilih PPD) Betong, Emparie Tom, Kepala Pengajar SK St Bartholomew, Jerry Kani enggau Yang Dipertua PIBG SK St Bartholomew, Kho Ah Chu. –EDISI UKAS