KOTA SAMARAHAN: Bisi 727 penerima ba Sitak Samarahan udah diberi Gazet Rizab Komunal Bumiputera, surat pala tanah enggau pampas tanah enggau semua penyampau manggai RM5.26 juta.
Pengawa nyuaka hak nya dipenyadi Sapit Premier Sarawak ke mega Menteri Pengeraja Asal enggau Pemansang Mengeri II, Datuk Amar Awang Tengah Ali Hasan di Dewan Suarah Kota Samarahan, Hari Tiga.
Ari semua ke nerima nya, 18 nerima Gazet Rizab Komunal Bumiputera nengah Seksyen 6 Kanun Tanah Sarawak (KTS), 622 nerima surat pala tanah Seksyen 18 enggau 33 penerima Seksyen 13 KTS.
Kelimpah ari nya, 73 iti chek pampas sepenyampau RM5,256,513.30 diberi ngagai 54 penerima ke beempu tanah ba dua iti projek pemansang.
Penguasa Tanah enggau Survei Sitak Samarahan, Ahmad Raslan Yaiyah ba pengawa nya madah, naka 11 November 2026, bisi 23,839.69 hektar tanah di Sitak Samarahan udah disukat nengah Inisiatif Baru Nyukat Tanah Hak Adat Bumiputera (NCR) Seksyen 6 KTS, alai 11,044.93 hektar ari semua nya udah digazet.
Ba renggat 2 inisiatif nya nengah Seksyen 18 KTS, bisi 3,440 lot individu ke mungkur 3,288.41 hektar pemesai udah disukat ba sitak nya.
Ba pengawa nya mega, bela disua, 11 iti gazet nengah Seksyen 6 KTS lalu ditangkan surat pala tanah tujuh genturung pendiau, urung 466.75 hektar tauka 1,153.36 ekar pemesai nengah Seksyen 18 KTS.
Tujuh genturung pendiau tu iya nya Kampung Mang, Kampung Sampun Tebun, Kampung Tanjung Pedada, Kampung Semera, Kampung Stok, Kampung Nangka enggau Kampung Tebelu.
Kelimpah ari nya, 39 surat pala tanah Seksyen 13 KTS disua ngagai 24 penerima di Kampung Moyan Laut.
Ba pekara bekaul, Ahmad Raslan madah, bisi 52 iti projek ngambi tanah ungkup pemansang dirikodka ba Sitak Samarahan ke mungkur empat projek Perintah Besai enggau 48 iti projek Perintah Sarawak.
Berebak enggau nya, 28 iti chek beungkus urung RM4.87 juta disua ngagai 12 penerima Projek Samarahan Administrative Centre (IAC).
Kelimpah ari nya, 45 iti chek beungkus RM386,276.90 disua ngagai 42 penerima ungkup Projek Nagang Tanah Tusur Sungai Kampung Sageng.
Bela datai maya nya, Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah, Sapit Menteri Pemansang Genturung Pendiau enggau Kandang Menua ke mega Kaban Parlimen Kota Samarahan, Datuk Rubiah Wang sereta pemesai ke bukai.-EDISI UKAS
