Batu Kawa Tau Nyadi Palan Mengeri Berakup Baka KLCC
KUCHING: Batu Kawa bisi penau dikemansangka nyadi palan mengeri berakup ngena konsep baka Kuala Lumpur City Centre (KLCC) ketegal ngembuan pemesai ti engkeman enggau pemansang ke udah bisi.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg madah, pengelebih dikembuan nya deka ngemuntangka pengawa ngangkatka Batu Kawa nyadi palan pemansang baru di Kuching.
"Batu Kawa tu ngembuan pemesai ke chukup sereta pengelebih ke ulih dikemansang baka KLCC," pia ku iya.
Iya nerangka pekara maya pengerami bejadika Projek Jalai Batu Kawa ke Jalai Stephen Yong ditu, Hari Tiga.
Iya madah, Batu Kawa udah jauh mansang enti dibanding enggau dulu kelia, sebaka enggau pemansang Kuching.
Pengawa ngemansangka menua nya bela disukung nengah Projek Jalai Batu Kawa ke Jalai Stephen Yong ke beungkus RM207.88 juta ngena belanja ari Perintah Sarawak.
Projek 5.664 kilometer pemanjai nya digaga ari simpang Kawa-Matang di Sungai Moyan ngelawa simpang Jalai Stephen Yong ke bela digagaka dua iti jematan meraka Sungai Moyan enggau Sungai Sarawak.-EDISI UKAS
