KUCHING: Perintah Sarawak ngenegapka langgur ngaga jalai alun di Kuching nengah Pelin Besai Trafik Kuching nyentuk 2030 dikena mutar penanggul jalai majak sekut nyerumba pemansang ke benung nyadi.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg madah, pelin besai bepelasarka data, simulasyen enggau model deka nyadi lalau ngagai perintah ngelanggur ngaga jalai baru.

Ku iya, sebagi ari projek tu nyengkaum Jalai Batu Kawa ngelawa Jalai Stephen Yong beungkus RM207.88 juta ngena belanja Perintah Sarawak.

"RM207 juta bajet negeri ari belanja nengeri dikena kitai mutar penanggul trafik sekut di Batu Kawa ke majak nyadi ketegal rumah majak mayuh digaga ba endur nya," ku iya.

Iya bejaku munyi nya maya dirandau media sepengudah bejadika Pengawa Ngelanchar Projek Ngaga Jalai Batu Kawa ngelawa Jalai Stephen Yong ditu, Hari Tiga.

Datuk Patinggi Abang Zohari mega madah, langgur timpuh panjai bela mungkur pengawa nangkir Jalai Malihah di Matang nyadi empat gembar enggau jalai baru Siburan, Kota Samarahan enggau Serian nengah Kampung Munggu Kopi ke Gedong.

Kelimpah ari nya, jalai di Petra Jaya bela dilanggur diaduka nengah Jalai Matang, Telaga Ai enggau jalai Bako-Buntal.

"Kitai udah bisi data enggau langgur nyentuk 2030 lalu kitai ngaga simulasyen enggau model trafik dikena kitai melabaka dini taba genturung pendiau ke baru ti deka digagaka jalai alun manah," ku iya madah baru.

Nitihka padah Opis Kereja Raya (JKR) Sarawak, projek Jalai Batu Kawa ngelawa Jalai Stephen Yong 5.664 kilometer pemanjai digaga ngena standard U3.

Jalai ngelawa Simpang Batu Kawa-Matang di Sungai Moyan datai ba Simpang Jalai Stephen Yong nya disadang ulih ngurangka agi penyekut ba Jalai Batu Kawa-Kuching.

Projek nya udah berengkah 11 Februari 2026 lalu disadang tembu 2029.

Sama bela datai ba pengerami nya, Sapit Premier Sarawak ke mega Menteri Infrastruktur enggau Pemansang Penyangkai Kapal Sarawak, Datuk Amar Douglas Uggah Embas, Datuk Amar Profesor Dr Sim Kui Hian, Sapit Menteri Infrastruktur enggau Pemansang Penyangkai Kapal Sarawak, Datuk Ir Aidel Lariwoo enggau Sapit Menteri di Opis Premier Sarawak (Integriti enggau Ombudsman), Datuk Dr Juanda Jaya.-EDISI UKAS