KUCHING: Perintah Sarawak terus negap pengawa ngemansang ekosistem artificial intellegence (AI) ti inklusif nengah kerejasama sektor industri dikena ngelanggur tunga kuing pemansang teknologi nya di nengeri tu.

Inisiatif nya dipandang nengah randau diatur Sarawak Artificial Intelligence Centre Sdn. Bhd. (SAIC) nengah kerejasama Sarawak Business Federation (SBF) enggau Sarawak Civil Service Digitalisation Unit (SCSDU) ti ngempuru tuai dagang sereta pengari industri, ditu empai lama.

Randau nya nyadi pelasar ungkup perintah enggau pemekuh industri berandauka peluang, pemar sereta empas ngena AI ba bemacham sektor ekonomi seraya nunjukka ‘Sarawak AI Blueprint Kick-Off Journey’ ti deka diatur kena 27 Julai tu.

Tuai Pegawai Eksekutif SAIC, Profesor Dr Patrick Then madah, kerejasama industri beguna amat ngambi mereti ke peminta industri, ngelala pemar ngena enggau nentuka inisiatif AI dudi hari mengkang praktikal, relevan enggau besai empas.

“AI diatu benung ngubah landskap ekonomi enggau industri di serata dunya, nya kebuah kerejasama rat entara perintah, industri enggau raban akademik nyadi kebuah besai ngemujur pengulih teknologi nya.

“‘Sarawak AI Blueprint Kick-Off Journey’ nya pelasar beguna ngaul bemacham raban bekaul sereta ngulihka penemu ti ulih nempa tunga kuing AI di Sarawak,” ku iya.

Nangkan nya, Presiden SBF, Dato Jonathan Chai madah, komuniti dagang meseti sedia ngena teknologi AI dikena nambah produktiviti enggau mengkang besemekih ba ekonomi digital.

Ku iya, SBF keran nyukung nambah pengeleda bekaul AI nengah pengawa nerang ke program nya ngagai serakup kaban enggau rentayan dagang di selampur Sarawak.

“Kami ngelalu kaban SBF ngulu ‘Sarawak AI Blueprint Kick-Off Journey’ lalu meri penemu dikena nempa tunga kuing AI Sarawak,” ku iya.

Nambah ke nya, Sapit Direktor SCSDU, Adrian Chung madah ke kerejasama rat entara perintah enggau industri beguna amat nentuka AI dipejalai berurun enggau nemban agi.

“Nengah pengawa nanggam kerejasama entara sektor perintah enggau peribit, kitai ulih ngaga polisi sereta inisiatif ti praktikal, relevan enggau nyukung juluk transfomasyen digital Sarawak,” terang iya.

Randau nya mega meri peluang ngagai pengari industri bekunsi penemu bekaul tikas penyikap AI, pemansang pengereja pengawa, pemar transfomasyen digital sereta sukung ti diguna dikena ngerumban pengawa ngena teknologi nya ba dagang.

Nengah kerejasama SAIC, SCSDU enggau SBF, ‘Sarawak AI Blueprint Kick-Off Journey’ disadang nyadi penyungkak pengawa nambah pengeleda, kerejasama strategik sereta pemansang ekosistem AI ti meruan enggau inklusif di Sarawak.-EDISI UKAS