KUCHING: Program Sarawakku Sayang (SKS) Sitak Sri Aman nyadi pelasar Perintah Sarawak ngundang rayat dikena nentuka peranak menua pesisir bela bulih akses ngagai servis, bantu enggau peluang pemansang.

Sapit Menteri Dagang Antarabansa, Industri enggau Meranak Puku, Datuk Dr Malcolm Mussen Lamoh madahka chara ngundang peranak renggat baruh nya beguna endar lebih agi ngagai peranak di kandang menua Batang Ai enggau Lubok Antu ti betapi enggau penanggul jauh, perengka pengangkut enggau akses internet.

“Program tu ukai semina program komuniti aja, tang mega nyadi pelasar dikena mendingka sada rayat, meretika utai ti diguna sida sereta ngerapitka kaul entara perintah enggau komuniti,” ku iya lebuh dirandau ba program Juh Randau UKAS ditu, Hari Lima.

Ku iya, program tu mega meri peluang ngagai orang dagang menua ngelakuka produk kelimpah ngulihka penerang ke mayuh agi dikena ngerembaika dagang sida.

Berebak enggau nya, Residen Sitak Sri Aman, Mahra Salleh madahka bisi 52 buah agensi bekaul nengah 170 buah kaunter servis bisi disediaka naka diatu, ti mungkur servis perintah nengeri enggau Perintah Besai, kompeni ngaul perintah (GLC) sereta gerempung ukai dikuasa perintah (NGO).

Ku iya, tikas pengawa besikap program nya diatu udah lebih 90 peratus, lalu sida bisi timpuh urung seminggu da dikena ngatur semua pekara bukai.

Sekumbang pengawa tiga hari berunggu berengkah 30 Oktober nyentuk 1 November ba Kompleks Lumba Sri Aman, bala pengusung ulih ngulihka mayuh servis perintah, ngelawa pengawa pemandang Sarawak Pavilion sereta nyerungkai produk orang dagang menua tu nengah bansal bejual enggau dagang.

SKS Sri Aman mega deka ngatur Malam Budaya Sarawak kena 30 Oktober sereta beperindang enggau bala artis menua tu, seraya Konsert Rayat ti diatur kena 31 Oktober tu ila deka dirichah bala artis tebilang nyengkaum Baby Shima, Melissa Francis, Bob Yusof enggau ke bukai.

Bemacham aktiviti mega bisi diatur ungkup bala pengusung, nyengkaum lumba rama, petanque, bejalai bebala mayuh enggau e-lumba, kelimpah ari pekit bukai ti nyendiaka 102 perais nyengkaum sebuah entukar Perodua Bezza 1.0G nyadi perais besai.

Premier Sarawak, Datuk Patinggi Tan Sri Abang Johari Tun Openg disadang datai bejadika program nya kena 31 Oktober tu.-EDISI UKAS