KUCHING: Perintah Sarawak betuaika Gabungan Parti Sarawak (GPS) deka bejalaika tanggungpengawa administrasyen dalam kapasiti sementara pengudah Kunsil Nengeri (DUN) dipadam berengkah ari 26 Oktober tu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, administrasyen perintah enggau servis beguna deka bejalaika pengawa dikena nentuka peminta enggau pengelantang rayat seruran diberi perati sepanjai timpuh nya.

“Ba timpuh tu, perintah deka bejalaika tanggungpengawa ngena kapasiti nyadi perintah sementara, enggau nangkup utai diguna sereta konvensyen konstitusyen ke dikenai,” ku iya.

Iya nyebut pekara nya ba aum media khas di Kompleks Satria Pertiwi, ditu, Hari Lima.

Premier Sarawak madah, administrasyen perintah enggau servis diguna deka terus gawa baka selama dikena nentuka peminta enggau pengelantang rayat seruran dijaga.

Berebak enggau nya, Premier Sarawak minta semua raban, lebih agi parti politik, chalun enggau penyukung, ngambi seruran bebasaka undang-undang sereta ngasika atur sekumbang timpuh pengawa bepilih

Iya madah, semua raban patut sama ngetanka pengelikun, pengelantang enggau penyerakup Sarawak, kelimpah meri awak ngagai rayat milih pengari kediri, ke pemujur nengeri dudi hari.

Iya mega meri terima kasih ngagai rayat Sarawak ke udah pechaya enggau nyukung sekumbang ngatur pengawa, sereta ngenang jasa bala kaban DUN enggau servis perintah nengeri ngagai rayat.

Ke penemu mayuh, DUN Sarawak dipadam berengkah ari 26 Oktober 2026 dikena meri awak ngagai Pengawa Bepilih Besai Nengeri (PRN) Sarawak Ke-13.

Nitih Konstitusyen Nengeri Sarawak, pengawa bepilih patut diatur kandang 60 hari pengudah dipadam, seraya DUN baru patut baum enda ngelui ari timpuh 120 hari ari haribulan nya.-EDISI UKAS

Pemberita: Nur Nabilla
Gambar: Ameerul Syafiq Khir