KUCHING: Gabungan Parti Sarawak (GPS) deka ngena peneleba ke bisi enggau chalun baru ba pengawa milih manuk sabung ungkup kelang Pengawa Bepilih Besai Nengeri (PRN) Sarawak Ke-13.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pekara nya entara chara ke deka diperunding dikena nentuka rintai chalun GPS.

“Pekara ti ulih disebut aku ditu, tu deka nyadi pengawa ngena peneleba enggau chalun biak,” ku iya lebuh dirandau pengudah aum media khas di Kompleks Satria Pertiwi, ditu, Hari Lima.

Taja pia, Datuk Patinggi Abang Zohari madah, pemutus bekaul rintai chalun deka digaga pengudah aum diatur, seraya penyampau chalun baru ke deka disabung empai ditetapka.

Ngenang pekara engka chalun ke bisi diatu enda dipilih, iya nerang, bisi orang ngaga pemutus nyurutka diri lalu ukai dibuai.

Iya bela madahka GPS deka dulu agi ngatur aum sebedau aum media dikena nerangka pekara bekaul pengawa besikap parti napi PRN deka datai.-EDISI UKAS