KUCHING: Kunsil Nengeri (DUN) Sarawak dipadam berengkah ari 26 Oktober 2026 dikena meri awak ngagai Pengawa Bepilih Besai Nengeri (PRN) Sarawak Ke-13.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa nya bulih pemendar ari Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar, seriris enggau Perkara 21(2) Konstitusyen Nengeri Sarawak.

“Nya alai, seriris enggau Perkara 21(4) Konstitusyen, pengawa bepilih besai nnegeri patut diatur kandang 60 hari ari haribulan padam, lalu DUN ke baru patut dikangau baum ba siti haribulan enda laun ari 120 hari ari haribulan nya,” ku iya.

Iya nyebut pekara nya ba aum media khas di Kompleks Satria Pertiwi, ditu, Hari Lima.

Datuk Patinggi Abang Zohari madah, Komiti Besai Pengawa Bepilih (SPR) deka madahka penerang rasmi bekaul pengawa madam nya ngambi pengawa ke patut ulih dipejalaika.

Ku iya, haribulan nganjung nama enggau hari ngundi deka ditetap enggau dipadahka SPR.

Iya mega madah, DUN Sarawak Ke-19 berengkah baum kena 14 Februari 2022 ari baruh Perkara 21(3) Konstitusyen Nengeri Sarawak enggau nampung pengawa pengelama lima taun ari haribulan aum terubah, kelimpah dipadam tumu agi.

Ke penemu mayuh, DUN Sarawak Ke-19 deka abis timpuh bulan Februari 2027.

Maya PRN Sarawak Ke-12 ke diatur kena 18 Disember 2021, Gabungan Parti Sarawak (GPS) menang besai enggau 76 ari 82 penuduk ke dipelaban.

Bela datai, tiga Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Profesor Dr. Sim Kui Hian, raban Menteri Kabinet Sarawak, raban Sapit Menteri Kabinet Sarawak, sereta Tuai Sekretari Politik kepada Premier Sarawak Dato' Fazzrudin Abdul Rahman.-EDISI UKAS

Pemberita: Nur Nabilla
Gambar: Ameerul Syafiq Khir