Premier Sarawak Mujur Datai Di Seoul, Ngulu Aum RISEAP Ke-36
SEOUL: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg mujur datai di Seoul, Korea Selatan ngulu Aum Komiti Eksekutif Regional Islamic Da'wah Council for Southeast Asia and the Pacific (RISEAP) Ke-36.
Bilun khas ditepan Premier Sarawak mujur terengkah ba Padang Bilun Antarabansa Incheon urung pukul 9.25 malam Hari Dua (jam menua nya).
Penatai iya diambat, Sapit Menteri ba Opis Premier Sarawak (Pengatur Projek Agensi Pemansang Kandang Menua, DBKU enggau Pekara Islam) Datuk Dr Abdul Rahman Junaidi, Sapit Menteri Ekonomi Dato Hanifah Hajar Taib, Sekretari Kehormat RISEAP Dato' Mohamad Marzuki Mohamad Omar, Yang Dipertua Kaunsil Islam Sarawak Datuk Misnu Taha enggau Mufti Sarawak Datuk Kipli Yasin.
Kena Hari Tiga, Premier Sarawak ke mega Presiden RISEAP disadang ngetuai Aum Komiti Eksekutif RISEAP Ke-36 bepalan di The Plaza Seoul Hotel ke bela digulu raban ari menua bukai nyengkaum Thailand, Singapura, Taiwan, Korea, Jepun, Australia, New Zealand enggau Fiji.
Pekara ke deka disebut ba aum nya bekaul langgur deka nyiri Timor Leste nyadi kaban RISEAP, bejuraika ripot pemansang opis RISEAP di Kuching sereta ripot aktiviti zon utara, tengah enggau selatan sereta Sayap Indu ungkup taun 2025.
Kelimpah ari nya, Premier Sarawak enggau exco bukai mega dipelaba deka mutus alai ngatur Aum Besai RISEAP ke-21 2026 sereta pekara bukai ti beratika pengeransing negap komuniti Islam serantau ba bidang dakwah sereta pemansang sosioekonomi.
Muak ke lemai, Datuk Patinggi Abang Zohari disadang bejadika Tadika Korean Muslim Federal (KMF), pengawa nyeruri Seoul Central Mosque enggau Opis Halal KMF.
Iya mega deka ngulu program penerang pandak begulai enggau kaban KMF sebedau nembuka penemuai gawa dua hari iya ditu. Premier Sarawak disadang pulai baru ke Kuching Hari Empat tu. - EDISI UKAS
