JULAU: Pekara pelajar nyadi kunchi nempa pemujur dudi hari lebih agi ba rayat menua pesisir.
Kaban Kunsil Nengeri (ADUN) Meluan Dato Rolland Duat Jubin madah, Perintah Sarawak semampai ngemeratka pekara pelajar ke nyadi pugu pemansang modal mensia.
Ku iya, tu nyengkaum numbuh pelajar enda bebayar berengkah taun 2026 lebih agi ba pelajar Sains, Teknologi, Injiniring enggau Matematik (STEM).
"Pelajar ukai semina jalai muntang dikena ngemansutka diri ari penyeranta tang mega jematan ke ditengah ngelawa pemansang nengeri enggau menua.
"Perintah naka alah nentu semua rayat, enda ngira dini endur, bela ampit ngulihka pelajar betikas tinggi," ku iya madah.
Iya bejaku munyi nya maya bejadika Pengerami Apresiasyen enggau Graduasi Sekula Primari (SK) Tapang Punggu ditu, Hari Tiga tu tadi.
Dato Rolland mega ngelalau apai indai semampai betatika pelajar anak sida berengkah ari pun lalu seruran besaup enggau sekula sereta Gerempung Apai Indai enggau Pengajar (PIBG).
Ku iya, tu deka ngemuntangka agi nempa nembiak ti bepenemu sereta ngembuan ulah manah.
Bela datai maya nya Kepala Pengajar SK Tapang Punggu Diana Luxury Aloysius Alek enggau Pegawai Opis Pelajar Pelilih Julau Dali Rain.-EDISI UKAS
