KUCHING: Pemanah Gunung Santubong ukai semina ba rampa menua iya, tang mega bisi ngundan jerita lama ti nyadi pemun nempa sejarah Sarawak ke bisi pengulih diangkat nyadi Palan Pesaka Dunya UNESCO ba dudi hari.
Menteri Pemansang Indu, Ruang Bilik enggau Mensia Mayuh ke mega Kaban Parlimen Santubong Dato Sri Nancy Shukri madah, Santubong nyimpan mayuh sejarah ke bedau diserungkai abis.
“Palan arkeologi ke ditemu ba Sungai Jaong, Bukit Maras enggau Bukit Samarahan nyengala mandangka kandang menua nya kala nyadi palan dagang antarabansa kenyau abad ketujuh Masihi.
“Gunung Santubong ukai semina kelai geografi, tang lambang pengering tamadun purba ti ngembuan pengelandik metalurgi enggau rentayan maritim ti besai.
"Tu mandangka aki ini kitai suba udah bekaul enggau dunya luar sebedau bisi teknologi moden,” ku iya.
Iya madah munyi nya maya bejaku ba Seminar Pesaka Santubong: Eksplorasyen Penemu enggau Nyidi Tamadun ke diatur ba Palan Penyulut Teknologi Sarawak (CENTEXS) Santubong ditu, Hari Empat.
Kelimpah ari nya, iya madah, Santubong mega kaya enggau pengelantang rayat pupu bansa sereta penyerakup ti udah lama bisi di kandang menua nya ke nyadi pengelebih Santubong nyadi lambang pesaka rama enggau budaya Sarawak.
Bekaul program, Dato Sri Nancy nerangka rambai jaku ‘Eksplorasi Ilmu dan Jejak Tamadun’ setipak enggau pengeransing negap penemu mensia mayuh guna ngintu pesaka menua.
“Pesaka ukai semina ke disimpan ba muzium, tang patut diidupka baru nengah penemu enggau pemereti mensia mayuh,” ku iya baru.
Berebak enggau nya, iya bela ngelalau ngambi rebak biak nyadi Duta Pesaka Santubong nengah naburka penemu enggau semangat rinduka pesaka ngagai diri sebilik, bakih enggau rayat menua.
Sama datai, Tuai Pegawai Eksekutif CENTEXS Dato Syeed Mohd Hussein Wan Abdul Rahman, Sapit Tuai Direktor Arkib Menua Malaysia Ahmad Sukri Abdul Kadir, Menijar Besai Amanah Khairat Yayasan Budaya Melayu Sarawak (AKYBMS) Datu Dr Sanib Said enggau Pegawai Pelilih Kuching Zaidi Sarkawi. -EDISI UKAS
