INDONESIA: Sektor betanam betupi enggau berikan nyadi batang pekara dirandau Sarawak enggau Sumatera Utara serimbai penemuai basa Sapit Menteri Industi Pemakai, Komoditi enggau Pemansang Kandang Menua Sarawak Datuk Dr Abdul Rahman Ismail ngagai Sekretari Perintah Nengeri Sumatera Utara, Indonesia, Sulaiman Harahap di Bangunan Gubernur Provinsi Sumatera Utara, Hari Tiga tu tadi.

Penemuai basa nya ngemeratka pengulih nempa kerejasama dua buah menua ba pekara ngasil gas metana ari kelapa sawit enggau nupi ikan tilapia chara komersial ke dipeda ulih ngenegapka agi kaul ekonomi enggau teknologi.

Datuk Dr Abdul Rahman madah, kerejasama strategik nya ukai semina nyungkak produktiviti enggau tikas sektor betanam betupi enggau pengawa berikan aja tang bela tau nyaup pemansang meruan sereta pengelantang rayat menua pesisir dua buah menua.

Bela nyempulang penemuai basa maya nya, Kaban Kunsil Nengeri (ADUN) Telang Usan ke mega Kaban Komiti Direktor PPNS, Dato Dennis Ngau enggau Sekretari Mendam M-FICORD, Datu Sirai Daha.-EDISI UKAS