MIRI: Pengawa ngadu baru Palan Dialisis MRC Miri diatu udah 60 peratus tembu, kelai pengeransing nyungkak tikas pemanah servis dialisis.

Menteri Pengangkut Sarawak, Dato Sri Lee Kim Shin madah, pengawa ngadu palan nya beguna dikena nentuka pesakit berubat enggau likun, moden sereta nitih standard Opis Menteri Pengerai Malaysia (KKM).

"Palan tu siti ari palan dialisis pemadu manah di menua tu lalu pengawa ngadu baru tu deka nentuka pengerengka guna ditu nitih standard KKM," ku iya maya ngabas projek nya, Hari Lima.

Naka ke diatu palan nya nerima pemeri RM1.5 juta tang agi empai chukup nitih ungkus ke bendar iya nya RM4.541 juta.

Ketegal nya, Dato Sri Lee minta raban korporat, komuniti sereta gerempung ukai dikuasa perintah bela besaup ngambika palan nya ulih dikena berengah tengah taun ke deka datai.

Iya madah, Palan Dialisis MRC Miri nya aset ke beguna bendar ngagai rayat Sarawak lebih agi sida ke endang berubat ninting maya. -EDISI UKAS