KUCHING: Anugerah Festival Filem Antarabansa ASEAN (AIFFA) 2025 ngentapka penuduk Sarawak ba industri kreatif serantau pengudah mujur enggau richah diatur ba siti hotel tebilang ditu, malam Hari Enam.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg bisi datai ngerichah pengerami makai lemai gala nya bukti komitmen Sarawak ngemansang industri kreatif enggau ngerembai pengaruh budaya.

Penatai pelakun antarabansa, Simon Yam mega nambah pematak global ngagai pengerami nya lalu disukung pemerindang ari artis tebilang ASEAN.

Festival taun tu dipasuk 200 iku, penyampau pemadu tinggi kenyau ari ditumbuh ngelai pengandal serantau ngagai AIFFA enggau komitmen direktor filem ASEAN nyagu cherita budaya.

Direktor Festival, Livan Tajang madah, penambah tu nunjukka pengandal pengemeran seni serantau ngagai AIFFA sereta komitmen sida negap kerejasama budaya.

Tuai Akim, U-Wei Haji Saari nerang ke edisyen sekali tu nyadi ‘rikod pemadu tinggi’ seraya akim antarabansa, Herman Van Eyken madah ke filem ti dipandang nyadi karya ngelui budaya enggau identiti.

AIFFA 2025 mega ngaku karya serantau ti nyulut baka filem Filipina, The Gospel of the Beast ungkup Skrip Pemadu Manah, filem Vietnam Inside the Yellow Cocoon Shell ti menang Penyuntingan Filem Pemadu Manah sereta Direktor Pemadu Manah enggau filem Kemboja Tenement nyadi Filem Pemadu Manah.

Malaysia mega ngerami pemujur nengah Sweet Qismina enggau Wu Kang-Ren, seraya Indonesia enggau Brunei mega bela diaku.

Malam nya mega meri basa ngagai ikon serantau, nyengkaum direktor filem Filipina, Lav Diaz ti nerima Anugerah Pemujur Sepanjai Idup seraya pelakun Hong Kong, Simon Yam nerima Anugerah Inspirasyen ASEAN.

Festival mega tembu nengah tesau mekuh kerejasama serantau lalu pengatur nyemetak madah ke pangku pengawa AIFFA niki ke profil filem ASEAN sereta ngerembaika bekau kreatif Sarawak.

Sama datai iya nya Menteri Pemansang Indu, Ruang Bilik enggau Komuniti Dato’ Sri Nancy Shukri, Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah, bala Sapit Menteri Dagang Temuai, Industri Kreatif enggau Seni Pemerindang Datuk Snowdan Lawan enggau Datuk Sebastian Ting Chiew Yew sereta temuai dipebasa bukai. -EDISI UKAS

Pemberita: Alezxandria Kapple
Penyalin: Betrice Britney Dee
Gambar: Shahril Haqim