KUCHING: Tikas pelajar Sarawak majak mandang pemanah enggau penyulut ba peresa taun 2024.
Direktor Yayasan Sarawak, Datu Mohamad Junaidi Mohidin madah, pemutus peresa 2024 ngerikod Gred Purata Negeri (GPN) 4.84, niki 0.08 ti dibanding taun dulu ari nya.
“Kitai mega temegah ati enggau penyulut pelajar nengeri taun dulu ke alai SPM 2024 ngerikod Gred Purata Negeri (GPN) 4.84, nambah 0.08 ti dibanding taun dulu ari nya.
"Lalu, STPM 2024 ngerikod Purata Nilai Gred Keseluruhan (PNGK) 2.68 enggau 92 chalun peresa bulih PNGK 4.00 enggau 12 sekula ngerikod PNGK ngelui 3.00,” ku iya.
Iya madah munyi nya maya bejaku ba Program Nyua AKPS 2025 ti dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ditu, Hari Satu.
Datu Mohamad Junaidi madah, pemutus peresa ti majak manah tu mandangka pengeransing perintah enggau Yayasan Sarawak ngenegap sistem pelajar negeri, nyengkaum nengah program pelajar dikena nentuka nembiak menua pesisir enda tinggal ketegal palan diau tauka sosioekonomi.
Dikena ngayanka pengaga ati enggau penyulut pelajar, Yayasan Sarawak meri basa nengah Anugerah Khas YAB Premier Sarawak (AKPS) ngagai nembiak, pengajar, tuai enggau sekula ti ngayanka tikas penyulut pemadu manah sepemanjai taun 2024.
Sama datai, Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn, Sekretari Perintah Sarawak, Datuk Amar Mohamad Abu Bakar Marzuki sereta Sapit Menteri Pelajar, Inovasyen enggau Pemansang Penau Sarawak, Datuk Dr Annuar Rapaee.-EDISI UKAS
Pemberita: Grace John Lee
Gambar: Shahril Haqim Hamka
