KUCHING: Bisi 1,750 penyereta deka ngambi bagi ba IEM Engineers Run 2025 ke deka diatur kena Hari Minggu tu ba Petros, Batu Kawa.

Chairman IEM Pampang Sarawak, Ir Dr Angelia Liew San Chuin madah, program ninting taun enggau program 'flagship' IEM nya deka dipenyadi Sapit Premier Sarawak, Datuk Amar Profesor Dr Sim Kui Hian.

“Urung 1,750 penyereta taun tu, lalu tu pemadu mayuh ngambi bagi ba program nya kenyau ke udah diatur,” ku iya.

Iya madah munyi nya sepengudah ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kunsil Nengeri (DUN) Petra Jaya Hari Dua.

Maya nya mega, Dr Angelia mega ngelaluka penatai Premier Sarawak ngagai Pengerami Makai Lemai Ninting Taun IEM Sarawak 2025 ke disadang diatur kena 19 Disember tu di Palan Konvensyen Borneo Kuching (BCCK).

Nambah ke jaku iya, iya madah, ba taun baru, Sarawak mega deka nyadi tuai rumah ngatur Federation of Institutions of Engineering for Asia and the Pacific (FEIAP) ti ngempuru 23 raban ekonomi nyengkaum ari Malaysia, Singapura, Australia, Hong Kong, Indonesia, China enggau raban baru ari Dubai.

Ku iya, siti agi penemuai basa ngagai Premier Sarawak deka diatur pun taun baru dikena nyuaka surat pengelalu sereta meri penerang silik bekaul program FEIAP.

Sama datai ba penemuai nya, Sapit Chairman I, Datu Ir Dr Cassidy Morris sereta deligit IEM Pampang Sarawak.-EDISI UKAS

Pemberita: Grace John Lee
Gambar: M. Hanif Suhaimi