KUCHING: Rang Undang-Undang (RUU) Ngatur Penatai Meruan enggau Teda 2025 ukai semina RUU aja, tang undang-undang pemun ti nengkebang chara Sarawak ngatur penatai, ngintu pengelikun rampa menua sereta nempa ekonomi ti puh dudi hari.
Kaban Kunsil Nengeri (ADUN) Pelagus Wilson Nyabong Ijang madah, pekara ba RUU tu nyengala mandangka Sarawak benung ngalih ngagai atur teda ngagai atur penatai nengah nerenak prinsip ekonomi idar, industri gadung enggau pemansang meruan ti nyadi pugu agenda ekonomi Pelin Pemansang Pengudah COVID-19 (PCDS) 2030.
"Inisiatif tu ukai semina engkeman diatur maya tu tang mega besai reti. Enti nadai institusyen penerit atur ti tegap, ekonomi idar enda ulih bejalai enggau efektif,” ku iya maya bejuraika RUU Ngatur Penatai Meruan enggau Teda 2025 ba Aum Ketiga Penggal Keempat Kunsil Nengeri (DUN) Sarawak ke-19 Hari Dua.
Wilson mega bekunsi penemu dikena nambah manah sekeda pekara ngambi nentuka rayat menua pesisir bela ngasai pemaik ari RUU tu, nyengkaum Skim Ngatur Teda Menua Pesisir nengah ngumpul teda betimpuh, palan proses ngena baru, kompos sereta unit proses teda betanam betupi kelimpah micro-lesen ungkup nembiak koperasi rumah panjai enggau gerempung komuniti dikena ngatur teda ke ulih dikena baru.
Kelimpah ari nya, iya ngarap pengawa numbuh Unit Ngintu Teda Sungai enggau atur terit khas sereta meri skim insentif teknologi gadung baka geran, subsidi ungkup PKS menua pesisir nengah sukung program rampa menua di sekula ngambi menua pesisir di Sarawak ulih ngasai pemaik ari ekonomi idar enggau pemansang meruan.-EDISI UKAS
