SRI AMAN: Kompeni besai ti ngambi bagi beguna endar ba pengawa negap projek ngeluar ke berau besai ba tibang padi selampur Sarawak nyengkaum Tanjung Bijat.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, nya dikena nambahka agi pengawa ngeluar ke berau orang bumai di nengeri tu.

“Kitai patut ngiga raban ti bisi kapasiti, pengulih enggau rentayan makit ti besai dikena ngemujurka pengawa.

“Berindik ari nya mih kompeni baka Advansia (Sarawak) ngatur projek bumai padi bedandang (di Tanjung Bijat) enggau mega sekeda kompeni bukai di Sekinchan," ku iya.

Iya bejaku munyi nya ba mua mayuh rambau Program Hari Ladang Sitak Pemansang Betanam Betupi Begulai (IADA) Batang Lupar di Tanjung Bijat ditu, Hari Tiga.

Berebak enggau nya, Dato Sri Dr Stephen Rundi mega ngansak orang bumai berubah ba pengawa betanam betupi sida nyengkaum ngena teknologi enggau chara moden baka ti dikereja orang bumai di Jepun, Vietnam enggau Thailand.

Ku iya ubah nya mega ulih mantu negap ke agi pengawa ngeluar ke berau ba nengeri tu ti deka meri jamin ngagai bekal pemakai menua.

Dulu ari nya, Program SMART Sawah Bedandang Besai di Sarawak udah dipejalai ti mungkal pengawa dipatau IADA Batang Lupar enggau pengawa begulai strategik kompeni Padiberas Nasional Berhad (BERNAS) enggau Advansia (Sarawak) mungkur tanah 83 hektar pemesai di Blok C, Tanjung Bijat kenyau ari Luar Musin taun 2021.

Projek nya ngaul 202 orang bumai enggau musin kedua taun 2023 udah meda pemujur projek pemungkal nya ngerikod pukul rata 5.5 tan per hektar dibanding 2.8 tan per hektar taun sebedau nya, ngena padi varieti MR269. -EDISI UKAS