KUCHING: Projek infrastruktur betikas besai ba utara Sarawak deka majak disungkak ke nyaup pengerembai ekonomi sereta ngenegap renyatan kaul serantau.

Sapit Premier Sarawak, Datuk Amar Awang Tengah Ali Hasan madah, Projek Jalai Nebing Tasik Utara diatu benung digaga ke mungkur lima pakej nyengkaum tiga pakej di Limbang enggau dua pakej di Lawas.

"Jalai tu deka nyambung Miri nengah Limbang enggau Lawas datai di Sabah nyengkaum nengah Brunei Darussalam ti deka ngemanahka agi sistem jalai di utara Sarawak,” pia ku iya.

Iya bejaku munyi nya maya dirandau media ba Pengerami Rindok Raya Opis Pemansang Koridor Wilayah (RECODA) ditu, Hari Tiga.

Ba pekara bekaul, iya madah, projek Sarawak Link Road ba renggat keterubah ari Lawas ke Long Lopeng diatu udah digaga 70 peratus.

Ku iya, projek tu deka ditampung renggat nangkan nya ke digaga RECODA ari Kuala Melinau nyentuk ke Miri lebih 142 kilometer pemanjai lalu disambung ngagai Jalai Besai Nebing Tasik Utara.

"Projek tu ukai semina ngaga jalai ke manah agi tang deka dikerembaika agi nyentuk datai ba entara menua Indonesia nengah Ba’kelalan,” pia ku iya.

Iya madah, projek pemansang nya disadang deka meransang sektor ekonomi nyengkaum ekodagang temuai, betanam betupi enggau industri seriris enggau pemansang nengeri.

Kelimpah ari nya, Datuk Amar Awang Tengah madah, projek padang bilun baru di Lawas diatu bela benung digaga.

Ba karan, iya madah, Lawas udah di sambung enggau grid karan nengeri kelimpah bela bisi langgur projek kuasa hidro, bekal ai enggau sistem telekomunikasyen.

Bela datai maya nya Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Menteri ba Opis Premier Sarawak Dato Sri John Sikie Tayai, Tuai Pegawai Eksekutif RECODA, Datuk Ismawi Ismuni, bala Sapit Menteri sereta bala bukai.-EDISI UKAS