KUCHING: Perintah Sarawak ransing nentuka raban bepenatai pemisi mit enggau jelan pemesai (B40 enggau M40) ulih meli rumah nengah projek rumah ulih dibeli enggau skim meli rumah.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, perintah ngungkupka RM121 juta ngagai Housing Development Corporation (HDC) dikena ngaga 11 projek rumah ulih dibeli ke nyengkaum 1,547 unit di Kuching, Betong, Sibu, Mukah, Bintulu, Miri enggau Limbang.
Ku iya, sepenyampau RM20 juta mega diungkup ngagai Mutiara Mortgage and Credit Sdn. Bhd. dikena nyaup meli rumah ungkup raban B40 enggau M40, ngambi mayuh agi rayat ngembuan rumah diri empu.
“Nyentuk September 2025, bisi RM83.5 juta udah diberi ngagai 1,371 pemeli.
"Inisiatif tu ukai semina ngaga rumah, tang mega meri peluang ngagai rayat ngembuan rumah kediri empu enggau ungkus ke ulih dibayar," ku iya.
Iya madah munyi nya maya bejuraika Rang Undang-Undang (RUU) Bekal (2026) 2025 ba Aum Ketiga Penggal Keempat Kunsil Nengeri (DUN) Sarawak Ke-19, ditu, Hari Satu.
Kelimpah ari nya, Datuk Patinggi Abang Zohari madah, Perintah Sarawak mega deka terus meratika pemansang rumah panjai enggau skim bantu suwa ungkup raban B40.-EDISI UKAS
