SERIAN: Sekula Sekondari (SMK) Tebakang deka nurai sejarah lebuh semilan nembiak sida deka ngari ke sekula enggau Pelilih Serian ba dua program inovasyen antarabansa iya nya World Cup Innovation 2026 (IWC2026) enggau International Invention Innovation Competition 2026 (I3C2026) diatur di Universiti Negeri Jakarta, Indonesia ari 2 nyentuk 7 Jun ila.

SMK Tebakang entara sekula menua pesisir ti berani nyabung diri bepekit ba renggat global, lalu ngemegah nama Bagi Menua Serian ba penggau antarabansa.

Sekula nya deka nganjung tiga tim ba kategori inovasyen iya nya NeuroNova, CodeWave enggau Vellfire Team, ti deka nyabung penemu inovatif sida ti ulih meri empas besai ngagai komuniti global.

Kaban Parlimen Serian, Dato Sri Richard Riot Jaem udah nyua bantu belanja ngagai semilan nembiak nya kelai sukung ngagai sida nurun bepekit ba tikas antarabansa rambau siti pengawa rumpas diatur di Bilik Aum SMK Tebakang, kena Hari Empat.

Prinsipal SMK Tebakang, Benjamin Spencer Latif madah, nya siti sejarah besai kandang 51 taun sekula nya udah ditumbuh, pengudah sekula nya mujur nurun bepekit ba tikas global ba bidang Sains, Teknologi, Injiniring enggau Matematik (STEM).

“Sebedau tu, nembiak sekula mega bisi ngulu program di India taun 2025, tang sekali tu mai reti besai agi laban nurun bepekit inovasyen tikas dunya,” ku iya.

Iya mega madah, nya ukai semina ngerandang peluang ngagai nembiak bulih peneleba antarabansa aja, tang nyadi penyungkak pemansang budaya inovasyen ba nembiak menua pesisir.

Ku iya, pengawa nya mega ulih meri peransang ngagai sekula bukai berani nyabung diri bepekit ba tikas global sereta mandangka nembiak menua pesisir mega ulih bepekit ba panggau dunya.

Benjamin meri terima kasih ngagai Dato Sri Richard Riot ti udah meri sukung ngagai bala nembiak sereta ngarap ke kontinjen sekula nya bulih pemujur lalu pulai mai trofi ke Malaysia kena 7 Jun ila. -EDISI UKAS