LUBOK ANTU: Indu Opis Polis Pelilih (IPD) Lubok Antu negap penaluk, disiplin enggau integriti ba raban sida nengah Program Nyada Lagu Negaraku enggau Lafaz Ikrar Rukun Negara di Dewan Besar IPD Lubok Antu, empai lama.

Program nya digulu Tuai Polis Daerah Lubok Antu, DSP Pricha Azin disempulang 77 pegawai enggau staf ngaul Pegawai Kanan Polis (PKP), Pegawai Rendah Polis (PRP) sereta Pegawai Awam Polis (PAP).

Sekumbang program nya, bala penyereta nyada lagu Negaraku, Ibu Pertiwiku enggau Sang Saka Biru, dientudi sampi enggau Ikrar Rukun Negara sebedau tembu enggau lagu Polis Sedia Berkhidmat.

Tuju inisiatif nya narak penaluk, negap pengawa enggau integriti raban IPD Lubok Antu ngambi majak ransing bejalaika pangku pengawa sereta meri servis pemadu manah ngagai komuniti.-EDISI UKAS