SIMANGGANG: Karnival Gawai Bazaar Sri Aman 2026 diatur Kelab Penggemar Ngepan Iban Simanggang nyadi penyungkak ekonomi komuniti menua tumbuh kelimpah negap pemereti ati budaya raban bansa Dayak maya ngintu Gawai Dayak, 1 Jun tu.

Karnival ti dilanggur pengelama 10 hari ba pelaman besai Mini Stadium Sri Aman ujung bulan April nya deka nyendiaka 150 lot bazar ngagai pedagang lokal, lalu nya ngerandang peluang ngulihka belanja sereta ngeranchak aktiviti dagang.

Chairman pengatur, Samy Nyarapong madah, ari penyampau nya, 20 lot diungkupka bejual produk halal, seraya ke bukai bemacham kategori nyengkaum pemakai, ai irup, kraf jari enggau gari.

“Bazar tu diatur ukai semina ngerichah Gawai aja, tang nyadi pelasar orang dagang lokal ngelaku produk sida. Jam bejual diperambu ari pukul 10 pagi nyentuk 12 tengah malam,” ku iya lebuh dirandau.

Iya madah, haribulan pengawa deka diputus ba aum nangkan nya dalam tengan bulan tu.

Kelimpah aktiviti bejual, karnival nya mega bisi ngatur bemacham program main asal enggau pekit asal baka Pekit Gendang Pampat, Pekit Keling/Kumang Nembiak Mit 12 Taun enggau Biak Agi, Pekit Baju Kebaya, Pekit Karaoke, Pekit Bemukun sereta Pekit Minum Ai Tuak.

Ngerichahka agi karnival, sekeda artis Iban tebilang baka Maxwell Franklin Saran enggau Ricky Andrewson Ngalai disadang merindang bala mayuh.

Berebak enggau nya, Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis disadang datai bejadi karnival nya kena 15 Mei tu.

Samy mega madah, karnival nya dikearap ulih mandangka identiti masyarakat Dayak ngagai bala mayuh sereta negap penyerakup pupu bansa di Sri Aman.

Dulu ari nya, raban kelab udah ngatur randau enggau Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan di Kuching ungkup mantakka keretas jurai ngatur enggau minta sanding penemu dikena ngemanahka pejalai program nya. -EDISI UKAS