KUCHING: Sarawak nengah Opis Menteri Industri Pemakai, Komoditi enggau Pemansang Kandang Menua (M-FICORD) ngembuan juluk ati deka eksport jani enggau penyampau RM723 juta ba taun 2030 ngagai Kalimantan Barat, Indonesia enggau Pulau Pinang kelimpah Singapura enggau Selangor.
Sapit Menteri ba Opis Menteri nya, Datuk Martin Ben madah, M-FICORD nengah Opis Servis Veterinar Sarawak (DVS) benung berandau enggau Kalimantan Indonesia serta Pulau Pinang bekaul atur eksport jani idup.
"Ba taun 2030, Sarawak ulih ngasilka 860,000 iku jani setaun ke beungkus RM1.5 bilion enggau penyampau eksport manggai RM723 juta,” ku iya.
Iya nerangka pekara nya maya nimbal tanya Kaban Kunsil Nengeri (ADUN) Serembu, Dato Miro Simuh ba Aum Kunsil Nengeri (DUN) Sarawak KE-19 ditu, Hari Dua.
Iya mega madah, DVS diatu benung ngerembaika makit dagang nengah chara meransang pengawa ngasilka produk bekaul jani.
Ku iya, ba pengawa nentuka jani di Sarawak likun ari penyakit, M-FICORD besaup enggau DVS ngatur kimpin penemu biosekuriti ladang ngambika standard eksport dititih.
"Tu nyengkaum program nerang ngagai mensia mayuh enggau pemain industri, nyeliah penama produk pemakai ngena jani ari orang enda dikemendar, nagang import jani ari menua ke bisi penyakit sereta matau produk ari jani.
"Kelimpah ari nya, kitai mega matau, ngerampas sereta mansutka kompaun ngagai sida ti ngelanggar Ordinan Kesihatan Awam Veterinar 1999," ku iya madah baru. -EDISI UKAS
