BINTULU: Kerajaan Sarawak majak ngenegapka inklusiviti rama lebuh Program Healthy Athletes (HAP) dipejalai mujur serimbai pekit ‘Special Olympics (SO) Malaysia 6th National Games’ 2026 di SJK (C) Chung Hua Bintulu, lalu nambahka akses pengerai ngagai raban ti muntat enggau tasal (IDD).
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah nyemetak madah, pemujur pengawa ngerembaika inklusiviti ukai semina inisiatif ngintu pengelantang aja, tang hak genap rayat ti patut diberi.
“Chara inklusif tu setipak enggau Strategi Pemansang Pengudah COVID-19 (PCDS) 2030, enggau data diulih ari program nya nyadi pun dikena ngaga polisi dudi hari nentuka nadai raban dikemelu ba arus pemansang nengeri,” ku iya bejaku rambau program nya, Hari Minggu.
Sekumbang program nya, sepenyampau 391 atlit ari 11 disiplin lumba enggau main udah eperesa pengerai komprehensif ngaul lapan bidang penemu pakar, dipejalai 15 Direktor Klinikal sereta 97 voluntia pengerai.
Seraya 2,321 peresa pengerai dirikod enggau bayar servis dipelaba manggai RM3 ngagai RM4 juta, lalu nya ngayanka pemesai guna akses pengerai pechuma ngagai raban diselinting.
Asil beperesai pengerai nya nunjukka bisi sekeda kes raya nyengkaum dituku tumu ditepan penyakit baka Glaukoma enggai Pneumonia ba bala atlit ti benung bepekit, ngasuh intervensi tumu ulih dipejalai.
Nentuka asil peresa nya betul, chara inovatif mega dikena bala staf pengerai ti ngerasuk gari bechur kalas dikena ngurangka empas ‘White Coat Syndrome’ ba bala atlit, lalu nya mantu ngulihka asil pemutus tikas pengeri ti betul.
Seraya Direktor Klinikal program, Dr Toh Teck Hock madah ke urung 200 surat nampung perubat silik udah diberi ngambi bala atlit ulih berubat silik agi ba fasiliti pengerai semak sida.
Program nya mega diaku nyadi entara pemadu manah ba renggat nasional asil kerejasama strategik entara Hospital Bintulu, SEGi University, Bintulu Port, sereta raban voluntia ti regas ngaul diri nyengkaum bala nembiak sekula enggau gerempung komuniti.
Sama datai, Presiden enggau Tuai Pegawai Eksekutif Kumpulan Bintulu Port Holdings Berhad Dato Ruslan Abdul Ghani. -EDISI UKAS
