KUCHING: Unit Komunikasi Awam Sarawak (UKAS) udah ngatur randau begulai enggau Kaunsil Dagang Temuai Sarawak (STB) dikena ngenegapka pangku pengawa sereta pekara ngatur media.
Randau diatur ba Indu Opis UKAS ditu kena Hari Satu meri perati ngagai pengawa ngenegapka kerejasama strategik entara kededua raban ba pengawa ngelaku mayuh achara dagang temuai, lebih agi ngatur achara tikas antarabansa di Kuching.
Deligit STB betuai ke Direktor Digital enggau Komunikasyen, Melvin Jong disambut Direktor UKAS, Awang Putrayusrie Awang Redzuan.
Sama nyempulang Melvin Jong iya nya Menijar Komunikasyen, Aina Rashidah Md Noh enggau Penulung Menijar, Abdul Yazeed.
Deligit nya mega dibai ngabas Studio UKAS ngambi meda empu fasiliti enggau penau produksi media dikembuan agensi nya dikena nyukung ngerembaika penerang enggau ngelaku perintah nengeri.
Lebuh berandau, kededua raban sama mansutka penemu chara gawa begulai ngerembaika bungkur media lokal dikena nambah pengawa ngelaku program sereta matak mayuh agi temuai domestik enggau antarabansa ke Sarawak.
