KUCHING: Kaul dua menua, Sarawak–China majak ditegap nengah kerejasama pelajar, meranak puku enggau ngintu pengelantang, lalu nyaup juluk ati pemansang nengeri nuju pengerembai ekonomi ke deras agi.
Duta Besai Khas enggau Mutlak China ke Malaysia, Ouyang Yujing madah, kaul rat nya ulih dipeda nengah pemayuh nembiak China ke majak nambah belajar di Sarawak sereta kaul kompeni China ba macham projek strategik nengeri.
Nitih ku iya, kompeni ari China diatu bekerejasama rat enggau bakih kunsi Malaysia nyengkaum di Sarawak ngaga projek pemansang, kelimpah pengeransing ngenegap kaul dua menua.
“Kami ngembuan kaul ti manah amat enggau Sarawak. Mayuh nembiak China belajar ditu lalu mayuh kompeni China mega bekerejasama enggau bakih Malaysia ngaga projek di Sarawak,” ku iya.
Iya madah munyi nya pengudah ngatur penemuai basa ngagai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kunsil Nengeri (DUN) Petra Jaya, Hari Dua.
Penemuai nya mega bekaul pengawa besilih penemu senentang peluang kerejasama baru Sarawak enggau China.
Berebak enggau nya, Ouyang bela madah, iya udah nyua China Ambassador Scholarship sepenyampau RM40,000 ngagai Universiti Malaysia Sarawak (UNIMAS) dikena nyaup nembiak nampung pelajar sereta nitih program besilih akademik di China.
Deligit nya mega meri 300 chermin mata ngagai nembiak ke kurang penatai pemisi nyadi sebagi ari inisiatif ngintu pengelantang pelajar.
Ku iya, kaul Malaysia–China diatu ba tikas pemadu dinamik nangkan penemuai pemesai nyengkaum penemuai Presiden Xi Jinping ngagai Malaysia sereta dua bengkah penemuai Premier Li Qiang taun tu.
Penemuai Menteri Besai Malaysia sereta Sapit Menteri Besai mega ngenegap kaul strategik dua menua.
“Kami deka terus bekerejasama ngambi mai kaul enggau pemansang Sarawak datai ba tikas ke tinggi agi,” ku iya.
Sama datai, Sapit Premier Sarawak, Datuk Amar Profesor Dr Sim Kui Hian.-EDISI UKAS
Pemberita: Grace John Lee
Gambar: M. Hanif Suhaimi
