APACE 2026 Ngangkat Sarawak Nuju Hab Aeroangkasa Gadung Asia Pasifik
KUCHING: Sarawak ngenegap pengeransing nyadi hab aeroangkasa gadung kompetitif di rantau tu nengah pengawa ngatur Konferens enggau Pemandang Aeroangkasa Asia Pasifik (APACE) 2026 ke deka diatur ari 27 ngagai 29 Januari 2026 di Palan Konvensyen Borneo Kuching (BCCK).
Menteri Pelajar, Inovasyen enggau Pemansang Penau Sarawak (MEITD), Dato Sri Roland Sagah Wee Inn madah, konferens betikas antarabansa ti keterubah diatur nya deka ngempuru komuniti aeroangkasa global.
Nitih ku iya, pengawa ngatur APACE 2026 mega mandang pengeransing perintah nengeri ngemansangka sektor aeroangkasa, injiniring enggau teknologi gadung dikena nyungkak ekonomi baru.
“Tu ukai semina siti agi konferens, APACE 2026 deka nyadi konferens besai ti nyerakup komuniti aeroangkasa enggau penerebai bilun global,” ku iya ba aum media APACE 2026 di Kunsil Nengeri (DUN) Sarawak, Hari Empat.
Nambah ke jaku iya, Dato Sri Roland Sagah madah, Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg deka bejadika konferens nya kena 27 Januari 2026.
Iya madah, APACE 2026 deka beratika empat batang bidang iya nya pemansang aerotropolis, digitalisasyen enggau teknologi moden ba aeroangkasa, idar ngagai penerebai meruan bepelasarka kuasa gadung sereta pemansang penau dikena ngadaka pengereja pengawa dudi hari ti bepengelandik tinggi.
"Program tu disadang ngempuru lebih 3,000 orang datai, lebih 1,000 pengari, lebih 50 penyereta pemandang enggau lebih 60 pengelicha tebilang, ti mungkur lebih 50 sesyen konferens nyengkaum ari National Aerospace Industry Corporation (NAICO Malaysia), NACO Netherlands, Malaysian Space Agency (MYSA), Japan Aerospace Exploration Agency (JAXA) enggau NOVASPACE Perancis," ku iya.
Iya mega madah, randau ke diatu agi benung diputus lalu dipelaba ngasilka lima ngagai tujuh Sempekat Pemereti Ati (MoU) sepemanjai konferens ke nyadi kelai pengerindu sereta pengandal pemeranak puku global ba pengulih besai ekosistem aeroangkasa Sarawak.
Sama datai ba aum media nya, Sapit Menteri MEITD Datuk Dr. Annuar Rapa’ee, Sektetari Mendam MEITD Datu Adana Jed enggau Direktor Eksekutif Borneo Business Connect Sdn Bhd Nadzeem Abd Rahman.-EDISI UKAS
