KUCHING: Pemayuh temuai datai ke Sarawak ari Januari ngagai Mac agi ba tikas positif taja napi ungkus pejalai ke nambah ketegal penyarut nyadi di Timur Tengah nyengkaum rega minyak niki.

Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, rikod dalam kandang tiga bulan keterubah taun tu mandangka penyampau temuai ke datai agi mayuh.

"Kitai deka majak berati lalu ngarap pekara tu mengkang positif taja bisi perang nyadi alai rega minyak pan niki.

"Sebagi besai ari temuai tu datai ari Brunei, Indonesia enggau Singapura, lalu kitai enda nangi amat ke pekara tu," ku iya madah.

Iya bejaku munyi nya maya dirandau media ba Pengerami Serumpun Sarawak ditu, Hari Tiga.

Iya mega madah, Menteri Dagang Temuai, Seni enggau Budaya Dato Sri Tiong King Sing bela madahka penyampau temuai ke Malaysia ba bulan Mac agi baka selama.

Bekaul nyangka bisi bantu diberi ngagai pemain industri dagang temuai, ku iya, pekara nya deka diperunding bepelasarka empas ke amat nyadi ditapi sektor nya.

"Kitai deka meda baka ni empas ke ditapi sida lalu Perintah Besai mega sama bela deka beratika pekara tu," ku iya madah baru.

Maya nya mega, iya ngelansa pekara bekaul ngetuka dulu penerebai bilun Batik Air ngagai Sibu enggau Bintulu ketegal penanggul global nyengkaum rega minyak niki.

Ku iya, operasyen kompeni penerebai bilun nya bepanggai ba pekara komersial lebih agi bisi sekeda penerebai bilun enda mayuh ketegal rega tikit.

Taja pia, iya andal pekara nya enda lama nyadi sepengudah penanggul geopolitik pulai manah.

Sama bisi datai maya nya Sapit Menteri Dagang Temuai, Industri Kreatif enggau Seni Pemerindang Sarawak Datuk Snowdan Lawan enggau Datuk Sebastian Ting Chiew Yew, Chairman Sarawak Tourism Board ke mega Kaban Kunsil Nengeri (ADUN) Telang Usan, Chairman Opis Pemansang Ekonomi Sarawak (SEDC) Tan Sri Datuk Amar Abdul Aziz Husain, Sekretari Mendam opis menteri nya, Morshidi Frederick sereta bala bukai. -EDISI UKAS

Pemberita: Ahmad Daniel Faiz