55 Bas Hidrogen Deka Belabuh Bejalai Ujung Taun Tu
KUCHING: Pengawa ngepun Sistem Pengangkut Mengeri Kuching (KUTS) disadang belabuh ujung taun tu alai Sarawak Metro merambu deka berengkah enggau 55 buah bas ngena hidrogen.
Direktor Komunikasyen Korporat, Program SEED enggau Kaul Bumiputera Sarawak Metro, Alexius Barieng madah, bas hidrogen keterubah deka datai bulan September tu ila.
"Tu nangkan penatai Autonomous Rapid Transit (ART) tengan taun tu.
"Lalu ujung taun, kitai deka ngepunka pejalai keterubah dua iti sistem tu," ku iya madah.
Iya nerangka pekara nya maya betuaika deligit Sarawak Metro nemuai basa ngagai Direktor UKAS, Awang Putrayusrie Awang Redzuan ditu, Hari Tiga tu tadi.
Ku iya, kelimpah teknologi pengangkut nadai karbon, Sarawak Metro diatu mega ngaduka pemansang modal mensia menua nengah Program Pemansang Sosioekonomi (seed).
Iya madah, program nya nyengkaum nganjung pengari ngagai menua China ngambi latih industri ba pengelama empat minggu.
