BETONG: Projek ngaga Replika Kubu Rentap ba Bukit Sadok beungkus RM16 juta deka nyaup nyungkak sektor dagang temuai bepelasarka sejarah di Betong.

Sapit Premier Sarawak Datuk Amar Douglas Uggah Embas madah, inisiatif nya disadang ulih mai pemaik ngagai rayat di menua nya bekaul pengawa dagang temuai enggau ekonomi.

Ku iya, pengari rayat di menua Betong semampai beratika chara dikena matak penatai temuai nemuai ngagai menua nya.

"Projek tu bela ulih mai pemaik ngagai rayat.

"Kami naka alah ngaga pengawa ti tau matak penatai temuai ngagai menua Betong," ku iya madah.

Iya bejaku munyi nya ba pengawa Nasih Tanah enggau Nyua Taba Projek Replika Kubu Rentap di Bukit Sadok, Hari Tiga tu tadi.

Kaban Kunsil Nengeri (ADUN) Bukit Saban nya madah, sektor dagang temuai nyadi pugu ngenegap ekonomi rayat nengah pengawa dagang enggau kereja puang.

Ku iya, projek nya digaga ngena konsep rumah panjai lama ti nyengkaum 10 chalet ti disikap enggau pantry, bilik mandi, tanju, panggau, ruai, tempuan enggau palan penerang.

Projek nya udah digaga berengkah 24 Mac tu tadi lalu disadang tembu 28 Mac 2028.

Kelimpah ari nya, projek ngaga jalai 3.1 kilometer pemanjai ari Rumah Panjai Jambu Kerampak ngelawa kaki Bukit Sadok bela digaga ngena ungkus RM39 juta.

Bela datai maya nya Ex-Sapit Kepala Menteri Sarawak Datuk Patinggi Tan Sri (Dr) Alfred Jabu Numpang enggau Kaban Parlimen Betong Dato Dr. Richard Rapu.-EDISI UKAS