KUCHING: Peranak sitak Kunsil Nengeri (DUN) Ngemah ngarap projek nangkir Jalai Batu Luking ngagai Teluk enggau projek nyeleti jalai batang ngagai Ulu Ngemah ulih dirumban.

Nitih ku Kaban Kunsil Nengeri (ADUN) Ngemah, Anyi Jana, taja Jalai Batu Luking udah lama tembu, rumah panjai di Teluk agi jauh laban nadai jalai ditengah.

Berindik ari nya, iya ngarap pengawa nangkir jalai nya digaga lengkas ngambi peranak menua dia enda agi ngena sungai.

Iya madah munyi nya maya bejuraika Rang Undang-Undang Bekal (2026) 2025 ba Aum Ketiga Penggal Keempat Kunsil Nengeri (DUN) Sarawak Ke-19, Hari Empat.

Maya nya mega, Anyi minta jalai darat ngelawa SPS Nanga Jagau enggau Ulu Sungai Ngemah, ti diatu semina nengah jalai batang ke udah jai, ulih diseleti jampat.

Ku iya, pengawa nyeleti tu ukai semina deka nambah manah pengelikun enggau akses perengka guna, tang deka nyungkak pemansang sosioekonomi ungkup rayat menua pesisir.

Anyi ngarap Perintah Sarawak majak ransing nentu kandang menua pesisir enda tinggal pemansang nengah projek baka nya. -EDISI UKAS

Pemberita: Leya Ameera Annuar Rigos
Gambar: Jaed Tepus