KUCHING: Tim Kaunsil Lumba Sekula Bagi Menua (MSSB) Kuching nyadi champion Trofi Emas Yayasan Sarawak 2025 pengudah ngalahka MSSB Serian 1-0 ba renggat final di Stadium Negeri Sarawak kena Hari Enam.

MSSB Mukah enggau MSSB Betong entara rintai empat tim pemadu manah bela bulih penuduk ketiga enggau keempat.

Pengawa nyua perais dipenyadi Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar.

Nambah ke nya, penyulut MSSB Kuching majak pegari nengah pemujur dua pemain iya nya Adam Jonas Zichei anak Martha Annys dipadu nyadi Penyaga Gol Pemadu Manah.

Seraya, Stevestephen Ronald Pengarah anak Francis dipilih nerima Anugerah Pemain Pemadu Manah Renggat Kepenudi seraya mandangka penyulut tim nya ba edisyen sekali tu.

Bisi mega dibantai sekeda anugerah khas nyengkaum Anugerah Pemain Dikeandal ti dipenggi Akqmal Al-Halim Duat ari MSSB Betong, seraya Anugerah Nyipak Bol Pemadu Mayuh diempu Danish Darren Edruce ari MSSB Limbang pengudah nyipak empat bol sepanjai pekit nya.

Anugerah Pemain Penyerakup diempu Mohammad Dzuelazriel Sim ari MSSB Mukah, seraya Anugerah Fair Play diempu tim MSSB Mukah berindik ari disiplin enggau semangat beraban dipandang sida.

Taun tu, pekit nya dipasuk 12 MSSB ungkup kategori Baruh 16 Taun, ngaul 240 pemain, 101 pegawai tim enggau 112 kaban komiti ti bemalam ba Kuching pengelama enam hari nentuka pekit nya mujur.

Pekit tu nyadi pelasar besai ngelala penau baruh 16 taun ngambi dipasuk ngagai tim MSSS, MSSM sereta program pemansang ba Sekula Lumba Nengeri. - EDISI UKAS

Pemberita: Ahmad Daniel Faiz
Gambar: Ibanez Jeffery & Mohd Shahril